ست الستات

النميرى نافع | مصر

ست الستات..
لما بتغضب..
بتقولى حاجات..
لوغاريتمات..
ترطن بلغات..
فشر الخواجات..

داتك غوره..
وداك الدل..
وروح تتشندل..
عمال تتحندل..

قال زعلانه..
كله عشان..
سبت عشيه باب العشه..
قال مفتوح..
دكر المالط..
عض الوزات..

نقد منهم..
خمسه صغار..
نتف الريش..
وأحدث إصابات..

افتح يلا..
واسأل جوجل..
واعمل سيرش..

أمى قالتلي..
داتك غوره..
وداك الدل..
وروح تتشندل..

جوجل تنح..
وفجأة اتشل..

وقالي كلام..
بصراحه يزعل ومينفعش..

فاكرني بهزر أو بتريق..
أصله مايعرفش..

شافني زعلت..
راجع نفسه..
وقالي خلاص..
سماح النوبه ومتزعلش..

شكلك طيب وماتقصدش..

انا راح أدلك..
على اللى يقولك..
سر كلام ست الستات..

اسأل حد يكون متخصص..
برديات..

أو اسأل جدك..
أو اسأل ستك..
أو حد قديم م البلديات..

ونصيحه من جوجل..
بلاش تانى الاسئله ديه..

وخلينا اخوات..

ست الستات..
لما بتفرح..
كانت تضحك..
وكانت تصفى..
وتبدأ تحكى..

احلى الحكايات..

ست الستات..
لما بتحزن..
كان القلب بيقطر دمع..
قبل العين..

كانوا حيطان البيت..
بيحزنوا ليها..

وتسمع أنات..

ست الستات..
لما بتطبخ ولا بتخبز..

لتقولى شيفات ولا حركات..

اول رصه مع التقليه يوم السوق..

احلى الأكلات..

ست الستات..
لما تربى وأما تكبر..

تطلع أبطال..

صبيان وبنات..

ست الستات..

لمعاها لغات ولا شهادات..

هيا يادوبك حافظه الفاتحه…
والمعوذتين..

هما اللي معاها..

ف الصلوات..

ست الستات..
لما كبرنا..
بس عرفنا..

كل كلامها لما بتغضب..

مكنش شتيمه..

كان دعوات..

… حفظ الله امى وأمهاتكم..
… ورحم الله المتوفيات منهن..
واسكنهن الفردوس الأعلى..
من غير حساب ولا سابق عذاب..

… بعض الألفاظ العاميه مثل
داتك غوره.. داك الدل… روح تتشندل..
ما هى إلا كلمات للتوبيخ..
… المالط… الدجاج الرومي ..