سعيد شحاتة | مصر
تصدير أول
“يا ربّنا”
…… علّمتنا
…………… من قبل ألف وربعميّه وكام سنه
…………. إزاي نحب الناس ونعشق أرضنا
“يا ربّنا”
….. علّمتنا
وقت الزهق والضيق وذلّ العكننه
…………… ندعي لبلدنا المؤمنه
“يا ربّنا”
الموت بينهش في البيوت
…. والصمت فاق حدّ الزنا
والنيل في مصر بيسألك
… مين اللي رخّص دمّنا
تصدير تاني
1
الوطن يقدر يحكّم حضرة السادة الأفاضل
ربّنا لوحده اللي عالم بالسراير والبواطن
الوطن قادر يميّز باش غني أو باش مناضل
ربّنا لوحده اللي مانح قلبى رتبة باش مواطن
* * *
2
إيه يعمل العطارين وقت احتدام الضّيق
وإزاي كلامها الزلال ما بقاش يبلّ الريق
كتب الحكيم للحكيمه ف قايمة الأوجاع
ما اقدرش أغيّر وطن … متربّي ع الخوازيق
تصدير تالت
أنا مستعد
وابني الصُّغيّر مستعد
وسلاحي فوق كتفي الضعيف
جاهز ومستنظر يسدّ
فـ ياريت تسيبوا النيل يحدد سكّته
ويواجه الفرعون وجيشه المستبدّ
* * *
أنا الرافض ..
ومش خايف ولا مهتم
أنا الرافض..
ومش هيهمني خاين ومش هاتلمّ
أنا الرافض..
ودمّ الورد مش ممكن
……………. يهون ع الورد غير بالدمّ
أنا الرافض
وعاشق مصر من لحظة
………………. ما صارت للجناين أم
