أدري.. من الشعر النبطي العُماني

عبد الله الحكماني | سلطنة عُمان

ادري الدنيا صغيره ونا عقلي كبير

وادري العالم تمثّل ونا صادق شعور

///

وادري الايام ما هي لصافين الضمير

وادري العيش الحقيقي وسط وسع الصدور

///

وادري القولون وقعه على وضعي خطير

قاطع احلامي وغادي م هو ذاك الجسور

///

وادري انّي قبل شيبي عن الدنيا بسير

كونني مبدع وعمري كما عمر الزهور

///

وادري انّي والشعر ما يفرّقنا مصير

لو بحاول فيه يوقف على نقطة عبور

///

وادري أنّي في زمن به انا مخلوق غير

وانفجر فكر ونقا في وجوه اهل الفجور

///

وادري انّي كلما صادف دروبي حقير

ياتني نفحة تسامي يخالطها غرور

///

وادري أنك يالرخم فارش الدنيا حصير

لوّاً طيور البسيطة بها ثمة صقور

///

وادري اني رغم قلة يدي ماني فقير

دامها نفسي غنية وقلبي فيه نور

///

وادري انّ المال منّي يصيح ويستجير

عن مسايرتي تخلّى بغى له سوق عور

///

وادري اعيوني بصيره وعقلي مستنير

لكن ايديني قصيره وتخذلني الشهور

///

وادري انه ما معي غير وجهك يالخبير

من صراعاتي الخفيّه ومن راسن يدور