مقامك غالى
أحمد السمان | مصر
مقامك غالى يا أمى
يامالكه القلب والأشواق
على حضنك أنا اتربيت
ولسه لحضنك أنا بشتاق
يا ساكنة القلب من جوة
بحبك والله وبقوة
ومش عارف أغنيلك
أو أكتب كلمة عل الأوراق
وهكتب إيه أنا وقلمى
ياناقشه الحنة على قدمى
وواهبة إيديكى لى خدمى
وفاتحة طريقى لو ضاق
يا قلمى حاسب إستنا
وكيف راح توصف الجنة
كبيرك بس تتمنى
وتبقى يدوب من العشاق
ده كلمة يامه وحديها
ماتحلى حياتى غير بيها
ومين يوصف معانيها
ده معناها فى القلوب براق
أنا مين ربانى على الطيبة
وجنبنى من العيبة
غيرك إنتى ياحبيبة
يامنبع صافى للأخلاق
ده حزنى بيتقلب فرحة
يوم مابشملك طرحه
على إيديكى العيون سارحة
فى دنيا الحب والأشواق
يا أعظم شيئ فى دنيايا
ياشمس الصبح لسمايا
بحبك والله يامايا
يا أجمل نعمة من الرزاق
بحبك حب متحبش
مخلى القلب متلبش
وماسك فيكى ومكلبش
لأنه من حنانك داق
ده حبك ليا ده سعادة
وحبي ليكى ده عبادة
رضاكى يا أمى دى شهادة
رضاكى من رضا الخلاق
عليكى نبينا وصانى
ياوردة حب فى غيطانى
وطارحه وسط أحضانى
وماده العنق ويا الساق
ياراسمة القلب على إيدك
بدعى ربنا يعيدك
بصحة وعافية يوم عيدك
ويبعد عنا أى فراق
