كسر قزاز
رشا فؤاد | شاعرة ومصورة فوتوغرافية محترفة
زلازل وقتيه
لصدمات زى اليويو
بتردك للواقع
واااااقف ثابت
وكإن العمر محطه بتعشق إدمانك للدهشه
هاتنزل فين
وتداوى ملامحك ف
المرايات (كسر قزاز)
دايما واخدك من روحك مشروخ
لكن شرخ معاكس للحزن
بيصور صورة
بيشوف الفيلم ف آخر التتر
ماهوش كامل
وكإن الرفض بيترجم جواه
بالموت الناقص
وحياه بتحاور صرعاته
بالتعتيم (سلويت)
أتارى الخوف خيالات جواه بتترجم حاضر
رغم انه بيقص ف شجر الليل سهره
وينادى عيال
الوقت الضايع بين حلمه
يجروا عليه بنظرة عارفين
الخط الفاضل ف المسافات
كان إحنا
كان طيران ثابت
لمحاوله تخريج العنف اللى مسقط
على خوفه دموعنا
توثيق طيب للحاله
بغرض الردع الأبدى للصدمات اليويو
الملضومه كسر قزاز