أعان الله الشعراء.. بالمحكية الفلسطينية

نداء يونس | فلسطين

 الشعراء مطلوب منهم يكتبوا ما يطلبه المستمعون

كل واحد بده الشاعر اما يكتب ع مزاجه او يتناول موضوعات يتفق معها حضرته او انه الشاعر يسايره بنص ما بوجع الراس وبالتحليل والربط. . يعني شعر take away. سهل الإعداد والهضم والتداول واذا عاطفي وغنائي وهالقد فش فيه ايديولوجيا ولا بنتمي لاي شي ولا بعكس قناعات ولا موقف سياسي ولا بذاءة لفظية. شي قصيدة بس ما بشتغل كسلطة معرفية ولا بتحكي شي وما بتصدم ولا بتسائل اي مقدس اجتماعي او موروث او انا وجدنا اباءنا على امةٍ.
بدهم شعر بشبههم، بفكر مثلهم وحتى بلبس مثلهم وبحكي بنفس لغتهم بس مش السرية.
تابعت التهجم على مظفر: اللي بقلك صوره عن القدس مقززة وتخاطب عقد انثوية واللي بحكيلك شعره عادي او يسار اسلامي او شيعي او شغل مسرحة واستعراض وخطابة واللي بقلك الشعبي احلى والفصيح افضل وكان عايش ع نفقة نظام ما وانهى حياته تحت نظام تاني وهو اصلا كان اخر 20 سنة عنده زهايمر وطول عمره منفي وشو بده المنفي، واللي بنسب له قصائد تافهة وبناقش الموضوع بجد.
الاسوأ هو اللي بقدس مظفر وبحاول يدعم عظمته من منطلق سطحي هو انتشار شعره فقط او الاحتفاظ بشعره حتى اخر نفس في ظروف صعبة، وهذا تفكير للاسف لا يرقى لمكانة مظفر الاستثنائية، هذا الشاعر اللي حكى شو اغلبنا بدنا نحكي وغضب وصرخ وانسجن واتبهدل وعشق وكره وآمن بفلسطين وانحرق عليها وكان صادق حتى اخر نفس وعمل ازاحات بلاغية صادمة وجميلة.
اذا على التمسك بمنتج والاحتفاظ به ومسألة الانتشار، بتذكر ان روايات عبير كانت البنات بتنضرب بالقشاط من اهلهم لما يلاقوها تحت مخدتهم وبرجعوا بشتروها، ولم يوزع في تاريخ العالم العربي اكثر منها ومن روايات الجيب.
كل ما يمكنني ان اقول بعيدا عن نهش الشعراء بعد موتهم او اسطرة تخدم التطفل على القضايا، انه الشعر مصهر معرفي، شو يعني مصهر، يعني كل العالم بدخل جوا الشاعر ويعاد انتاجه بالطريقة اللي بفكر فيها الشاعر، طريقة الشاعر لقول العالم والاشياء. مش طريقتك انت او كيف بتفكر انت.
من خلال الشاعر المفروض تشوف شي جديد مش تشوف حالك.
الشاعر مثلك بشئ واحد، انه ممكن يكون انخدع، انخدع ببطولة وتحمس الها او بموقف ما واخطأ. انه انحاز او نبذ شئ ما بناء على فهمه هو للحاله وكمان مش فهمك. عباقرة المواقف: اعطوني موقف كلكم متفقين عليه.
انه الشاعر يكتب بعقلية المتلقين، هذي ورطة حقيقية للشعر ذاته وللنقد. ولا انكر تورط مظفر فيها، لكن ورطته كانت جميلة ومغايرة، اعترف.
هل هناك واقع اكثر بذاءة وابن كلب اكثر من واقعنا هذا.