أوراق الخريف.. شيزوفرينيا (2)

شرين خليل | مصر
لم أكتفي بما قرأته في كتب علم النفس الخاصة بدراسة نيفين فالإجابة عن الأسئلة التي تدور في عقلي لم تكن كافية فما وجدته في الكتب مجرد تعريفات نظرية وبعض النظريات التي تفسر الشيزوفرينيا..
قررت الخروج من هذه الدائرة والبحث بشكل أكبر حتى وقع تحت يدي كتاب جذبني بشدة قرأته بروحي وقلبي الكتاب يحتوي على مجموعة حكايات لبعض الأشخاص المصابون بالشيزوفرينيا كنت أقرأ وأنا أتخيل آلاء ومدى معاناتها وآلامها بعض سطور هذا الكتاب ماهي إلا أحاسيس ممزقة ومشاعر مرهقة وصف دقيق لما يشعر به مريض الشيزوفرينيا فهناك من تقول”أعاني من فوضى عارمة في داخلي وأظهر لكم هدوءًا مرعبًا..”
وأخرى تقول” ذات المشاعر المنفصمة
هذا اللقب الذي دائمًا ينعتوني به أطفال حينا لم أفهم معنى ذلك، لكن أعرف أني لا أقوى على التعبير عن مشاعري، عندما أريد أن أُعبر وابوح مافي داخلي أعجز عن ذلك والأوهام تحتلني وتحتل تفكيري أشعر وكأن هناك شخص ما يلاحقني، وأعجز عن التركيز ف التشويش في تفكيري يُنتج ذلك، هذا غير سماع الأصوات عندما أكون في مكان لوحدي اسمع وأشعر بأن هناك أحدٌ غيري والخوف من أن شخصٌ ما سيؤذيني يحتلني بالكامل”
أغلقت الكتاب وتألمت بشدة لِما قرأت فهناك من يتعذب بسبب هذا المرض ويعيش مع عالم آخر في وسط تخيلات وهلاوس وأوهام يسمع نداءات ويرى أشياء لا وجود لها ولن يصدقه أحد إذا تكلم وشكى بل سيُوصف بالجنون..

شعرت بالتعاطف الشديد مع آلاء فلقد تخيلتها وحيدة، حزينة، لاتجد من يحنو عليها ويشعر بها فهي في أشد الأحتياج لمن يساعدها ويقف بجانبها..
في الصباح وأنا في طريقي إلى عملي تروادني بعض الأفكار فلقد تأثرت جداً بما قرأته في الكتاب عن معاناة أصحاب هذا المرض..انظر إلى الناس في الطريق بصورة بمختلفة فيها ود ورحمة فكم من مريض يُعاني ، هناك من يتألم دون أن يشعر به أحد، يصرخ يستغيث، ويخشى أشياء لا وجود لها .
روحه مبعثرة، قلبه لا ينبض سوى بالخوف بداخل عقله صراعات تمزق تفكيره وكأن هناك آله حادة تطرق رأسه في كل دقيقة ..
يبتعد عن الجميع حتى لا يسمع مالايطيق ويزداد الألم…
لذا قررت بعد الانتهاء من عملي الذهاب إليها في مكان عملها لأطمئن عليها وكما توقعت فهي مريضة ولم تأتي للعمل ..
وقفت حائرة، ماذا أفعل؟ أذهب إلى بيتها؟ فأنا لا أعرف أين تسكن؟ في النهاية قررت العودة إلى المنزل وأخبر أمي بما حدث..
عندما أخبرت أمي، أسرعت بالإتصال على والدة آلاء وسألتها عن حالة آلاء وقالت لها بأن زوجها تشاجر معها من أجل المال وانهارت آلاء ودخلت في نوبة عصبية شديدة..
أغلقت أمي الهاتف وقالت : دي نتيجة اللي تستعجل في الجواز وتتجوز واحد مش مؤهل للجواز ..
شفتي يانور جوزها بيتخانق معاها عشان ياخد فلوسها..
البنت دي طول عمرها مظلومة من أهلها ودلوقتي من جوزها كانت فاكره إن الجواز هايخلصها من ظلم أهلها..
خرجت نيفين من غرفتها وقالت:ممكن أقعد معاكو ولا بتقولوا أسرار؟؟
ردت أمي :
-تعالي ياحبيبتي ارتاحي من المذاكرة شويه ..
-يعني مفيش أسرار ؟؟
– مفيش أسرار يابنتي إحنا بنتكلم عن آلاء..
نظرت نيفين إليّ وقالت : تاني يانور آلاء تاني ؟؟
-أيوا يانوفي أنا أتأكد أنها عندها شيزوفرينيا ..
-ياسلام يادكتورة نور وإتأكدتي إزاي؟؟
– تصرفاتها مطابقة لكل اللي قريته..
-لا دا احنا كده نفتح لك عيادة وتسيبك من شغل البنك..
-شايفه ياماما نيفين بتسخر مني ..
-فهموني يابنات إيه الحكاية..
– أنا هافهمك ياماما نور بنتك قرت لها كتابين تلاته ففاكره نفسها تقدر تشخص وتقرر وتقول دا عنده مرض نفسي عشان هي شاكه إن آلاء عندها مرض نفسي وأنا بصراحة بقول إن آلاء دي كدابه ..
-يابنات شاغلين بالكو بالبنت دي ليه سواء مريضة ولا كدابه انتو مالكو..
-دا اللي بقوله لنور ياماما بقولها تبعد عنها ..
-يانيفين ليه القسوة دي عليها أنا عاوزه اساعدها لأنها لجأت لي وبعدين ماما قالت لي إنها طول عمرها في مشاكل مع أهلها يعني كانت عايشه معاهم في غربة ووحدة وعذاب واتجوزت عشان تهرب من كل دا وللأسف جوزها سئ هو كمان ..نسيبها لما تنتحر مثلاً..
-نورهان ياحبيبة قلبي إنتي تعرفي جوزها ؟ اتكلمتي معاه؟؟ طبعاً لا ..
يبقى هاتحكمي إزاي؟؟ مش يمكن يطلع هو اللي مظلوم..لازم تسمعي من كل الأطراف ممكن تديني فرصة يومين هاخلص امتحاناتي واساعدك في إنك تعرفي عنها كل حاجة..
-ياريت يانيفين لأن البنت دي صعبانة عليا جداً عاوزه أساعدها بأي طريقة..
-شوفي يانور هاقولك تاني مش أي حد يقولك حاجة تصدقيها .
-أنا صدقتها بعد ماقريت عن المرض دا ..
-بردو حكمتي عليها إنها مريضة..
-قولي إنتِ يانيفين هانم تفسيرك للحالة دي بس من غير ماتقولي إنها كدابة..
-هاقولك طبعاً عشان تعرفي إني شاطرة وبذاكر..
-اتفضلي قولي وخلصيني..
-في حاجه يانور اسمها الألعاب النفسية ..
-الألعاب النفسية؟!!
-أيوا ناس كتير بتستخدمها عشان تأثر على اللي قدامها أو عشان توصل لهدف معين ..
-إزاي ؟؟
-هاضرب لك مثال؛ عارفه اللي بيكون غلطان بس يقنع اللي قدامه أن هو اللي غلطان بيقلب الطربيزة يعني فهمتي يانور؟
-أيوا فهمت بس آلاء دي هاتعمل كده ليه ..
-دا اللي هانعرفه لما نعرف عنها كل حاجة ونتعامل معاها بشكل أقرب..النفس البشرية مش بسهوله تفهميها في ناس واضحة وفي ناس معقدة وفي ناس بارعة التمثيل وفي ناس فعلاً مريضة وفي ناس محتاجه الحب والأمان…
-أول مرة كلامك يعجبني يانيفين..
-الحمد لله إنك بدأتي تقتنعي بكلامي..
-عموماً على ماتخلصي إمتحانات هاكمل قراية كتب عن الشيزوفرينيا وكمان عن الألعاب النفسية بصراحة الموضوع دا شدني جداً..
-جميل يانور إنك تقري وتنمي أفكارك بمعلومات مفيدة ومهمة بس مشكلتك إنك عاطفية أكتر من اللازم وكأنك بتهربي من طريقة شغلك وحياتك العملية اللي كلها أرقام وحسابات يعني حياة جافة..
-معاكِ حق فعلاً ..
-خلاص اتفقنا ؟؟
-اتفقنا..
-تمام هاروح أكمل مذاكرتي..دعواتك يانور..
-ربنا يوفقك ياحبيبتي ..
دخلت نيفين حجرتها وأمي مشغولة في إعداد الطعام أما أنا فعقلي يفكر في كل كلمة قالتها نيفين، فمن الواضح أن هناك أشياء لا نعلمها ولا نفهمها بسهولة ..
من الآن وحتى تنتهي نيفين من الأمتحانات سأبدأ في البحث عن الألعاب النفسية وأحاول فهمها بشكل أوضح ..