أوراق الخريف.. شيزوفرينيا (٥)

شرين خليل | مصر 
دخلت آلاء مركز لعلاج الإدمان..
ومش بسهولة ندخل وراها ونعرف هي داخله ليه لإن دا ممنوع طبعاً عشان خصوصية المرضى ..
لكن بالتأكيد هي داخله تتعالج…عرفتي يانور ليه طلبت منك تبعدي عنها لأنها خطر علينا واضح إنها ماشية في طريق غلط..
-بتقولي مركز الإدمان يعني بتتعالج يبقى فين الغلط؟؟ هي كده بتصحح الغلط..
–واحنا ليه نورط نفسنا مع واحده غامضة وتصرفاتها غريبة..
-قصدك مريضة؟؟
-ليه مصممة تدافعي عنها ؟
-مش عارفه بس حاسه إنها ضحية؟
-ضحية مين؟
-أهلها..
-هي فعلاً ضحية ..
بس هي دلوقتي تخطت المرحلة دي وأصبحت مسؤولة عن تصرفاتها وحياتها مستقلة بعيد عن أهلها..
-هي فعلاً حياتها مستقلة لكن دا الظاهر اللي قدامنا أما الحقيقة فهي غير يانيفين التربية لها أثر كبير في تكوين شخصية الإنسان وهي اتربت تربية سيئة وافتقدت العطف والحنان..
-المسألة مش مسألة عطف وحنان دي مسألة أخلاق وسلوكيات..
-عموماً أنا هارتاح شوية وبليل هاننزل أنا وأنتِ نروح لوالدة نهى تسمعي منها بنفسك ونعرف منها موضوع الإدمان دا..
خرجت نيفين وتركتني في حيرة من أمري فكلما استقرت نفسي على قرار وهدأ تفكيري تجاه آلاء يظهر موضوع جديد يشغل عقلي وبالي ..
أصبحنا في هذه الدنيا غرباء، تحدث لنا أشياء غريبة لم تكن في الحسبان ولم نسمع عنها . عالم مخيف يحيط بنا.
قُتلت البراءة وانهارت منظومة الأخلاق وتلاشى الصدق وسيطر الكذب والخداع..
غشاوة على القلب والعقل..
انتظرت الليل يأتي حتى أذهب إلى هذه السيدة التي تعرف آلاء جيداً وتُخبرني بما أتوقعه وهو أن آلاء كاذبة..
أما ما بداخلي فأنا أتمنى أن أن تكون صادقة..
مر الوقت ببطء شديد فما أصعب لحظات الإنتظار لم أخرج من غرفتي إلا لتناول الغداء وعُدت مسرعة إلى غرفتي انظر إلى الكتب التي أحضرتها من أجل أن أعرف مشكلة آلاء وأساعدها..
هذا كتاب الشيزوفرينيا..
يشرح أعراضها وأسبابها المرضية ويوضح الفرق بين اضطراب الشخصية الفصامية وبين مرض الفصام أو الشيزوفرينيا..
فما يحدث في الشيزوفرينيا هو خارج عن إرادة المريض فهو حقاً مريض يُعاني ويتألم أما في حالة آلاء فهي شيزوفرينيا بطريقة أخرى..
لا أنكر أنها مرت بحياة قاسية أثرت على حالتها النفسية وتصرفاتها ولكن ما الذي دفعها للإدمان..هل كان هروباً من حياتها ومن الواقع التي تعيشه..
لهذا السبب رأيتها تبكي في الحلم فالإدمان مثل خيوط العنكبوت التي تلتف وتتشابك تبدو في ظاهرها أنها قوية ولكنها في الحقيقة ضعيفة وتتمتاز بالوهن..
خيوط وهمية ولكنها تخنق من تلتف حوله ويشعر بأنه لايستطيع الإفلات منها فهو ذليل،مُغيب يجري في عروقه مُخدر يجعله فاقد السيطرة يتحكم فيه من يمتلك هذا المخدر اللعين أياً كان نوعه ..
لكن لكل داء دواء وقبل كل شيء لابد من معرفة الحقيقة كاملة ..
وجاء المساء وذهبنا إلى جارة آلاء وبدأت في سرد القصة بطريقتها البسيطة:
في البداية كنت فاكره إنهم ناس طيبين وإن أبو آلاء دا راجل غلبان لكن مع مرور الأيام عرفت إنه بيمثل علينا كلنا وأنه راجل استغلالي وانتهازي بيستغل طيبتنا ونيتنا الصافية ويضحك علينا وغير كده يضرب مراته بحجة أنه على قد حاله وهي بتطلب طلبات كتير وطبعاً إحنا مش عارفين حاجة فكنا بنعطف عليها وتاخد مننا الفلوس اللي محتاجاها أو التموين اللي البيت محتاجه لحد مالقيناهم فاتحين سوبر ماركت كبير بقينا مستغربين الفلوس دي كلها جات منين ..هو يقول عملت جمعية وهي تقول أخدت قرض ..
أما عيالهم فهما شرحه نفس الأب والأم .الكدب بيجري في دمهم وراثة يعني ..
المشكلة دلوقتي أنهم بيكدبوا على بعض وبيتهموا بعض يعني آلاء اتهمت أخوها بسرقة المشغل بتاعها..ودايماً تتهم جوزها إنه بيضربها مع إنه وقف جنبها كتير وساعدها كتير عشان تتغير وتبقى أحسن ..
-معلش ياطنط سؤال..
-اتفضلي ياحبيبتي..
-هي آلاء كانت مدمنة؟..
-مع إني المفروض ماقولش حاجه زي كده بس هقولك عشان عارفه إنك مش هاتطلعي الكلام بره عشان بردو يابنتي حرام نخوض في الكلام عنها ..هي فعلاً أدمنت بس غصب عنها اصل البنت دي نفسها تعيش بعيد عن أهلها وتصرفاتهم هي جواها جزء كويس بس مش قادرة تخرجه للنور، هي محتاجه للي ياخد بإيدها..
-طيب هي أدمنت أيه ووصلت له إزاي؟؟
– أدمنت حقن مخدرة اللي بيستخدموها الدكاترة في العمليات وعشان لها صاحبة شغالة في صيدلية كانت بتجيبهالها…
-معقولة في كده ازاي صاحبتها تعمل كده دا مخالف للقانون..
-يابنتي في ناس كتير بتخالف القانون وبتزور كمان وكل دا بسبب الفلوس..
واللي ماكنتش عاوزه أقوله إن المشغل بتاع آلاء ماتسرقش دي هي اللي باعت الحجات اللي فيه عشان الحقن دي..وجوزها لما عرف كان هايتجن بس هو بيحبها وبصراحة ماقصرش معاها ..ماتصدقوش كلام أمها ولا أبوها..ولو هاتساعدوها ساعدوها بعيد عنهم ومش بفلوس ..ساعدوها تتعالج وتبقى إنسانة كويسة..
-شكراً ياطنط..
انتهت الحكاية وخرجت وأنا حزينة مما سمعت عن آلاء وأهلها..هل يعلم هذا الأب الجُرم العظيم الذي ارتكبه في حق ابنته عندما أساء تربيتها ؟ وهذه الأم أيضاً..
كيف يكون هؤلاء آباء ؟ يزرعون الكذب والخداع في ابنائهم ليخرج إلى العالم جيل مشوه، جيل مُدمر..
ألا يعلم كل أب أنه سُيحاسب أمام الله..
وإنتِ أيتها الأم التى حملت وتعبت وسهرت هانت عليكِ كل هذه الأيام أضعتيها في سبيل المال ..
فالأولاد كنز وثروة لابد من الحفاظ عليها كالنبتة الصغيرة التي تزرعها وتسقيها وتراعيها تكبر وتصبح ثمرة كبيرة تعود عليك بالخير الوفير ولكن عدم التربية السليمة تجعلهم كنز زائف لايأتي إلا بالصراعات ..
ويضر بنفسه وبمن حوله ..
إذن فالخطوة القادمة ستكون كالتالي: سأذهب إلى آلاء وأهلها وأرى بعيني مايحدث وأحاول أن أساعدها فهذه قضيتي من البداية ولن اتخلى عنها ..