شهقة.. بالمحكية الشامية

ريتا سليمان | سورية

ودَّع ْ ربيع العمرْ .. لَوَّحْ إلي تشرينْ
واصفرّ زَرْع الحُب ورقة ورا ورقةْ
وبعدِك حكاية صِبا بمعبد التكوينْ
يدوّب حلاكي الهنا بقلوب محترقة
شعرك حكاية مسا.. بسمك تلج صَنّين
والخَدْ مَرْمَرْ بَهِي.. نعومة على رقّة
زمرّد عيونك شقي وفوق الخصر نسرين
نهدات حسرة و رجا عالشال مفترقة
والحلَقْ فضّة انشلح فوق الكتف تِخمين
يمرجح ظنوني وجع من تحت هالحلقة
مِلتي قبالي صرتْ مدبوح عالميلين
يخربش بفكري الأمل مشتاق للملقى
ياريت رَدّ الصبا مارد علاء الدين
في ألف آهة ولع بالروح عم تشقى
مين قال إنّي كبرت! عم تشعل كوانين
والغصن زهّر جنى شهقة على شهقة
ومين قال عنّي تهت..تركت الصلاة والدين
كلما خيالك مرق بسجد لهالخلقة