فلسفة الألم
نرمين علي | شاعرة وإعلامية مصرية
روحي الفراشة أصبحت زي الصخور
رجلي كواكب بس مش بتدور
ثابتة مكاني بأقع وأقوم وأثور
بارسم في نور والعتمة جوايا
ليه الشجر الليلة بات زعلان؟
الحيطة واقفة تسندك أجدع من الإنسان!
صوت المنبه حتى نام زعلان
هيصحي مين وانا صاحية فـِ بكايا
ومعايا سورة طه والسبحة
عيني بتقرا والدموع سابحة
وحبة اركِّز ..
حبة اكون سارحة ..
كل الحقايق ثابتة إلايا
والنبض قاعد يرتجف ويقل
صوته بيخرج م الإيقاع ويضل
شجرة مشاعري عقيم ومالهاش ضل
الله يسامح نفسي وهوايا
العشق دوامة وجزر ومد
دخلت بحره فاكرة نفسي أشد
جبت لحياتي عشانه أمر الهد
بقيت قلم وعنادي برايا
فكتبت شعر حزين ومالهوش زي
وسرقت من شمس الوجع الضي
إزاي مشاعري اتكفنت وانا حي؟
ومخلّي تلج حروفي دفاية!
