يا ناى
محمود مرعي | مصر
متبعتره في الزمن
ألحانك الفضه
دموعنا معترضه
لكن عويلنا صروح
رويانه من نزفك
دبلانه يا كفك
يبسانه ودموعك
متحصنه بالروح
أَنفخ تطول الآه
تلحق جريد النخل
يبكي البلح في عُلاه
تنزف جروح الأتل
أنا كنت متدارى
جوه نسيم الليل
متغطى بالموويل
ومراقب القمره
مين شدنى من فوق
وحدفنى جوه النوح
ملعون ابوه البوح
سهانى ودبحنى
وشوانى كيه القنديل
وف صبح ماله مثيل
للندل طفحنى
شوم انضرب بالشوم
لحظة عويل البوم
شرب الخسيس كاسي
واتحنى بانفاسى
ورمى عضامى بعيد
بس البعيد معرفش
إن العضام دى بذور
ومسيره شمسه تدور
نحو الأفول وتنام
هي كده الأيام
من طلعة المشهد
ساقيه ودواره
لا تدوم على فرحه
ولا تبقى ع خساره
وف يوم أكيد راجع
شَجره ف مهب الريح
نخله عفيه يصح
فراشه حاضنه النور
عصفور كناريه يجوز
عفريت كما الأرجوز
يحيى الأراضى البور
وتزهزه الفدادين
يا لمة الخاينين
قلبى ساحات من نور
بتجمع المساكين
وبتنده الغايبين
وبتدعى ع الفجار
لكن كما الأنهار
بيروى كل الناس
أخيار على أنجاس
ما تفرق العله
لا يوم سأل مله
ولا قال أصيل وخسيس
يكشف غطا الحله
ويعبى جوف الكون
ربك أكيد في العون
إرمى الحمول وارتاح.
