مبدأها
أحمد الباز | مصر
بتكذب كل يوم كذبه
وأصدقها …
وبتلومني علي ظني
لو مره يبان مني
علي كلمه
لساني خاني ونطقها …
وقلبي كتير بيتأثر
ويتأسف ويتعذّر
ولأنه كتير
بيعشقها …
بيبلع كذبها في جوفه
ويداري عليها بكفوفه
وعايش في الحياه أحلام
محال انه يحققها …
يا اخيب قلب …..!
وسط الناس ..
مكانش حويط
يا قلب ودوبه الإحساس
يا قلب عبيط
بتضحك رغم أحزانك
في وش اللي كان صاحبك
ووش اللي يوم خانك
ولو ضحكت دنيتك مره
أوام الدمعه تلحقها …
منين هتلاقي صوت الصدق
وسط الزيف
وليه وقت الخداع انت
عاملي شريف
بتستنسق هواها بعمق أنفاسك
وعاشق قلبها رغم انه يوم داسك
وبتصدق كل حرفها وبتنسي
إن الكذب مبدأها …
