أميرة

نهال محسن | مصر

تشوفها تقول ايه الثبات ده ، والقوام ده ، مانيكان
قيمه ، سيما ، سنانها لولي ، وفي شبابها عنفوان
تقول دي مالكه الكون ، أميره ، والجمال عدا الكلام
تشوفها يجافي النوم عنيك . تنام ، تطلعلك فالمنام
بس اقولك عالحقيقه واصدمك ب أصعب كلام؟
دي جوا منها حرب دايره بس من بره تمام
والهموم بتزيد تملي ومتسألشي وصلو كام
ماشيه تضحك، عيونها تايهه، ضايعه، وف وسط الزحام
ماشيه تنده روحتي فين يافرحه، يابهجه و يا ابتسام
رحتو سبتو جرح قاسي ، كتير مآسي ، كتير آلام
بتداريهم جوا هدمه أنيقه بتخبي الحطام
والسعاده فيها نادره، واصله حد ل إنعدام
طبعا هتسأل سببه إيه، و ايه الي وصلها ليه
الإجابه وب بساطه، ومن حرفين هي العباره
إنه (حظ) الي قلبه طيب، كتير عطاؤه وكان قريب
وخذله احبابه أو صحابه، و كل مين فتح له بابُه
و رغم كل ده بتلاقيها توزع عالناس وردها
مهو العطاء شيمه في عروقها والأساسي عندها
بقلب حزين و بشفه تضحك تشتري الورد ب سلام
تديه لطفل عيونه حلوه ، أو ل اتنين دايبين غرام
وترجع بيتها ، و دي حكايتها
وبس كده .. خلص الكلام