حكايا من القرايا.. من رسالة أم لابنها المتغرّب

عمر عبد الرحمن نمر | فلسطين

الحمد لله يمّا، احنا واياك بألف خير، بس انت دير بالك على حالك، ولا تقلق علينا يمّا .. المشمشات السنة ملاح يمّا، حاملات ما شا الله عنهن، المشمشة الحموية لحالها بتعمل عشر بوكسات، الله طرح البرتشة يمّا، هذول بسدّين قسط أخوك صالح في الجامعة، والحمد لله كلها سنتين والله بنجحوا وبعوظ علينا يمّا… والسمسمات هذول خلليناهن عشان نعيّد منهن، ونجهز أخوتك للمدارس، وخروف الظحية جهزناه يمّا، منا وجوّا… ربيناه وهيو ما شا الله عنو… وقمحاتنا وزيتاتنا منا وجوّا… الحمد لله… ما ناقصنا إشي يمّا…

أبوك يما بسلم عليك… وحالتو هي هي… وقعتو عن ظهر القديش تشبيرة يما… ومن يومها ما قام… إلا بدرج بقاع الدار بعظ الأيام…

إنت دير بالك ع حالك… اصحى تبرد يمّا… بقولوا بلادكم باردة… وكل مليح ودير بالك نام مليح… ولا تحمل همنا بتاتاً… إذا انت مليح إحنا ملاح… بدي إياك تروح وانت معنعن ورافع راسك للسحابات… وحامل شهاداتك يمّا… والعروس بتستنا فيك قفا الباب يما…  والخطية برقبتك شو بتعتاز احنا حاظرين يما… لا تتأخر علينا في المكاتيب يما… المكتوب ثلثين المشاهدة… الجميع بهدوك السلام يما… سلم سلم على اصحابك كلهم… الله ينجحكم ويوفقكم… ويردكم سالمين غانمين لدوركم وبلادكم