عيش إنسان مش قرد

سعيد شحاته | شاعر مصري

أنا اسمي سعيد حامد عبد السلام شحاتة مواطن مصري على باب الله… وبأحبكم جدًّا ونفسي أعمل حاجة تليق بالحياة اللي شفتها ودقت طعمها وخفت منها واطمنت لها… زيي زي كل واحد شايف إن الحياة دي بكل قسوتها لازم البني آدم يشق غبارها ويقاوح على آخر ما يديه ربنا من عزم… ولازم يحارب عشان يسيب فيها أثر مهما حصل…
جايز الإمكانيات والظروف بتعاكس الواحد أوقات كتير… بس أدينا بنحاول… واللي شفته يخليني أعمل كده… وإصرار أمي وصبرها يخلوني أتمسك بالأمل دايمًا حتى لو منعدم… أمي مسكت في الحياة بإيديها وسنانها عشان تربيني وتعلمني… واتعلمت منها اللي ما اتعلمتهوش لا من جامعة ولا من كتاب ولا من أي حد…
اتعلمت إن كل السواد اللي ممكن تواجهه في العالم لازم تخرج منه منتصر مهما حصل… واتعلمت إن النور جواك أنت مش حواليك… عشان كده بأحاول أجري على قد ما يديني ربنا من عزم… يمكن أوصل لربع اللي وصلت له هي…. رغم إني ما عرقتش قدها ولا اتبهدلت زيها ولا عندي نص طاقتها وعزمها وإيمانها…
ما بأحبش حد يزعل مني… زي أمي برضه… ولو حد زعلان حقه على راسي… زي هي ما بتقول…
وماشي في الدنيا بحسها وبدعوتها اللي صدّرت بيها ديوان كلام أخضر… وبأرمح وصوتها في وداني دايمًا مطمني وهي بتقول لي في الشارع (ربنا يجعل خيلك رابح)…
مؤمن قوي إنكم أنتم السند والضهر… وإن الواحد من غير الناس زي القرد في خرابة… بس الناس اللي بجد… مش الناس الخرابات…. ولا الأشباح الآدمية ولا الكائنات البلاستيك…
ما عنديش شلة ولا مصالح مع حد ولا لي حسابات مع وسط ثقافي ولا قلقان من اللي بيحصل… بالعكس… مستمتع قوي بالتنطيط اللي حواليا وعارف إن كل شيء له وقت… وإن كل طاقة نور بتفتح في ميعادها… وإن (كله جاي بالجبر مش بالاختيار)… يعني جاي جاي إن شاء الله بأمر الله… وإن كل اللي بيتنطط بينهج قبل ما يوصل لأي حاجة… وبيقع لأن كل أقنعته بتنزل فبيكتشف إنه بقى من غير وش…
أرجوكم ما تقلقوش… واستمتعوا بالسيرك… ما فيش حاجة اسمها وسط… الوسط ده أنت اللي بتشكله… أما العصابات ف دول القرود اللي هتفرح بيها وهي بتتقافز على الشجر قدامك… وهتفرح أكتر لما تكتشف إنها بتحاول تبعدك وتزيحك وتقصيك… وتشوهك… اوعى تزعل… دا كله بيحصل لأنك إنسان… والقرد مش عايزك تدخل الحيز بتاعه… فهو بكده بيخدمك مش بيضرك…
ما فيش حاجة اسمها جوايز… جايزتك إنجازك… ورزقك جاي جاي… ما تخافش… دا مكتوب ومقدر…
ما فيش حاجة اسمها منصب ثقافي… بس في حاجة اسمها مثقف له كيانه…. المنصب ما بيصنعش… دا شيء إلى زوال… صدقك في فنك هو اللي بيصنعك… دا اللي بيفضل والأدلة موجودة وعد للصبح وشوف واكتشف بنفسك…
أرجوك عيش إنسان مش قرد… حتى لو القرود فتحولك وسمحولك وعملوك ملك عليهم فياريت تفتكر إنك مش قرد… عشان ما تخليش حد واقف بره القفص يستمتع بتنطيطك وأنت بتزقه وبتقصيه وبتحاول تزيحه… أو تكتشف لما الأقنعة تقع من على وشك إنك من غير وش فتخاف تواجه أصحابك القرود….
عشمي في ربنا مالهوش حدود… مؤمن قوي على قد ما شفت من ستر وكرم ورزق الحمد لله…
حبيت أتجوز… فما كانش في جيبي اتنين جنيه… ولا عندي وظيفة وكنت شغال صياد في بحيرة البرلس (مش بشهادتي… البحيرة بتقبل كل المؤهلات ما بتفرقش) المهم نويت… وعزمت وتوكلت على الله واتقدمت لبنت عمي… فوافقت… وربنا سترها معانا واتجوزنا الحمد لله…
طموحي في كل شيء بأسعاله كبير ويساوي كتير قوي… إلا طموحي الوظيفي… دا الوحيد اللي يساوي صفر… وعمري ما كان عندي أي طموح وظيفي ولا هيبقى الحمد لله….
ربنا يديم المحبة ويسعد كل إنسان محترم….
مش عارف إيه سبب البوست… وإيه الفايدة منه… لكنه اتكتب… ونشرته ?
شكرًا يا رب على كل شيء ?
?
دعواتكم

أخوكم
#سعيد_شحاتة