قليل من الزجل,, حوار مع سجادة للصلاة
محمد الحنيني- فلسطين | البرازيل
ما سألْ عنّو في المسجد غير سجادة الصلاة
قالت وينو قالوا راح ليش ما أخذني معاه
///
قالوا لاقى ربه لوحدو للحساب وللعقاب
قالت أنا راح أشهدلو يوم الحشر والحساب
///
قالوا شو بدك تساوي ربك أعلم بالقلوب
قالت أعمل اللي عليّ من الواجب والمطلوب
///
قالوا نحن المصلين ما اقدرنا نُحُطّك في الكفنْ
قالت إن شالله بيلاقي أحسن مني ف جنة عدنْ
///
قالوا ألله يِسمعْ منّكْ وينوّلنا هالجنات
قالت رب الكون العادل ما بيظلم المخلوقات
///
قالت دعوني في المسجد أتعطّر بالذكريات
قالوا غيرك أحَقْ منّكْ صاحبك إتْسَهّل ومات
