أبو الدنيا .. دارجة عراقية
مصطفى حرب | شاعرٌ عراقي
يا ابو الدنيا شغلاتك
يطيح كلشي وما تطيح من العيون الشايلاتك
كلشي بالدنيا حلو ماهو بحلاتك
تضيج بعيوني السما والكاك واكف
شايل جفوفك وتدعيلي بصلاتك
يا سمار الطف مغركني بنعمتك
وانه اقصر
من يمر عاشور اورد ما انشف نشفة لهاتك
وما اذب عكالي من اذكر بناتك
وامشي واتفكد خواتي وعايف مصيبة خواتك
كله ومن انخاك اشوفك
تفزع بنحرك الضامي الكله دم
وانولي وتوكف اخوان وصوت ابو واولاد عم
اتطشر بجف المعاصي ويمر عاشورك علي ويلمني لم
شما اتيه الكاك باب ..يعزب وجوه العرف والموعرف..واليجي بهمه يرد بليه هم
وانحني ابابك واحسك تطبع جفوفك بضهري من الشبك وتشمني شم
حبك شكد طلع وادم من زنازين الوهم
يالمهندم لائك بنبرة شموخك
ياثغر ما كايل الضالم نعم
فوك كل جلاد لازم نقره اسمك
يالسكيت تراب بذرات الكرامه وخضرت عز وقيم
انته لوما دمك ولوعة عيالك جا صبح كلشي عدم
يامن الخاطر سترنه جنت تتصدق خيم
طعمت ريشة الدين بدم رضيعك
وكضهه عباس ورسم
رسم روحة عين اخو بجية سهم
ورسم وكفة فارس بمصرع عضيده
حدب وحيله انهدم
وخبر واصل للمخيم طاح شيال العلم
هذا كله وانته واكف لونك ابيض
يشبه التاريخ ابوك
واليضدونك سواد بصف سواد
ناس بياعة ذمم
ناس منهه كماط طفلك ما سلم
وينهم؟؟
كبورهم صارت مكامن للقمامه
وانته قمه اعلى القمم
انته خدامك تشور. والدليل
الناس لسه علوك تاخذ من دشاديش الخدم
