آخر النهار
على نافع | شاعر مصري – الواحات
آخر النهار
و الشمس بتودع فى يومها
و الناس بتعمل جرد
لتعبها و همومها
و حصاد لكل اللى تم
و اللى اتفرش اتلم
اللى رجع مجبور
و اللى رجع للهم
كل اللى خرج الصبح
قاصد ببان الرزق
آخر نهاره عاد
يضحك فى وش الولاد
ضحكة تداري المرار
كل اللى خرج الصبح
رجع فى آخر النهار
حاسس بهدة حيل
و طبيعي تعب اليوم
يظهر فى آخر الليل
يغلب عليه النوم
ينسى التعب و ينام
و يادوب ساعات و يقوم
يبدأ فى عمره يوم
يشبه جميع ليام
…..
آخر النهار
ناس بترجع م التعب
علشان تنام
و ناس بتصحي
عشان تجهز للسهر
ما الليل ساعات بيكون نهار
للمبسوطين و الشقيانين
و اللى مقضيه فى السفر
و اللى عايشه مع الكتاب
و اللى بيجهز لفكرة
و اللى مشغول ع اللى غاب
و اللى شايل هم بكرة
و اللى بيفكر في ذكرة
و بسببها نومه طار
….
آخر النهار
وقت الرجوع م الغيط
و الشمس بتستخبي
ورا حيطان البيت
ساعة الرجوع للعش
و حبسة الكتاكيت
آخر النهار هو الحصاد
و حصيلة اليوم الطويل
و هو برضه
ساعة للتبديل
بين اللي كان ورديته طول النهار
و اللي هيمسك مطرحه بالليل
و اهى دنيا و دايرة بيك
ما تعرف انت ماشى
ولا بترجع ورا
آخر النهار نهاية
لحكاية متكررة…
