الشاعر الشعبي|ناجح عمارة – سوهاج – مصر
مصر الحنونة انا
طول عمري مبتغيرش
قلبي يحب ولادي
فيهم مبيفرطش
عشت الكتير وكتير
وشوفت العجايب يامة
وكمني قلبي كبير
بتيجي معا يا سلامة
ترابي دوا لناس
يداوي مبيعطلش
حتي اللي يوم جرحوني
ف جروحهم انا دويت
وللي في حملي فتوني
في حملهم خفيت
شلت الحمول علي كتفي
تعبانة ولا عيطش
يشهد عليا الزمن
اني تعبت كتير
الكل فيا نهب
ولسة منابي كبير
مهما الخلايق خدت
باقي ولا يخلصش
وصفوني كل الناس
اني اميرة العرب
وعدوي من قهرته
جاني ف ضهري ضرب
لكن مهما عمل
انا مبتأثرش
مذكورة في القرءان
اني في بيتي امان
وللي في يوم يأذيني
هيعيش حياته هوان
مهما ما لف ودار
هيتعب ولا يوصلش
مصر الحنونة انا
طول عمري مبتغيرش
قلبي يحب ولادي
فيهم ما بيفرطش
