من جيلي انذبحت.. شعر نبطي عُماني

عبد الله سعود الحكماني | سلطنة عمان

رحماك يا ربّي حزين
حزين وبحزني فرحت

ركضت بالدنيا سنين
ركضت وعييت وطمحت

رُميت من يومي أنين
في غبّة البحْر وسبحت

والحين؟مدري الحين وين
ضيّعت دربي من نجحت

يمحق زمان الناقصين
اللي يبون الفوق تحت

خُلِقت بالفطره أمين
في كَون جلّه كَوم سحت

لو أنّني بيد اليمين
داويت غيري وانجرحت

وتقفّل ابوجهي خزين
اللي قبل بيدي فتحت

نَحَتّ لاسمي قبلتين
في عالم الأوباش نحت

اذا احرقوني الطيّبين
شعّيت نور و طيب فحت

واذا احرجوني الحاسدين
شبّيت نار و نجم لحْت

هذا الأنا في عزلتين
صفاء ذات و شعر بحت

شاعر من النوع الثمين
لكنّ من جيلي انذبحت

جِهّال شعْر و عابثين
من شفتهم بوني سمحت

وامسيت في وسْط العرين
هذا كتبت و ذا مسحت

شعراً يخلّيني كمين
فكراً يروني به شطحت

والحزن في عمري دفين
شرحت ولّلا ما شرحت

بس الجبل ضلعه متين
وانا جبل ما يوم طحت