بيوت الحكي
فيصل سليمان / سوريا
ياليتنا نشلح قمر نلبس قمر
إنت وأنا ونيسان
نقشر عن الليل السهر
عا نبعة الغزلان
ونكمش فرح من غابة الحرمان
عن رمش ديسي مزيح ونعسان
من عيون غيمة صيف بالبستان
عن شط بوسةْ بن للفنجان
عن رجفة خصور الورد
كلما عزف ريح الصبا
عصافير بالوديان
….
شفت العطر ماشي وع كتفه شال
من ورد جوري
وكنزتو موال
قربت تاقله صباح الخير
شفت القلب متعلق بسلسال
……
يابنت ياضوع الهمس
يا رنة الخلخال
يلي عم ترش الشمس
وتفيق رفوف الحجل ع تلال
من وعد بكره وجرحة عيون الأمس
رح جمع النسمات من شي صيف
وابني على كتف القمر عرزال
تنعمر بيوت الحكي
ونقول يالمنقال
