ممكن تسيب روحك
مصطفى الجارحي | مصر
في الحتة دي بالظبط
تقدر تشوف البحر كامل
مُحتشم.. عريان
وناقص كام وخمسين موجة
بس مش مكسوف
//
تقدر تشوف المراكب وهيَّ بتبتدي الطيران
وبتداري البقع
وبتسد الشقوق والكهوف
//
تقدر تعد الملايكة المشغولين بالإنسحاب
وبتفتح الباب للجاز والبلوز
مرة بمحبة وألف بالمعروف
وترمي سنّارتك بطُعم الروح
تصطاد لك الشمس من بين السحاب
فيخاف يكش الخوف
//
في الحتّة دي بالظبط
ممكن تسيب روحك من غير ما تخاف عليها..
من ترمايات تتسلّى بالقضبان
ـ تطلع معاها لفوق لفوق
تنزل معاها لتحت تحت ـ
أو من فراشات متوحشة بتحط فجأة تطير
من غير بعد إذنك.. لو سمحت
من غير فرقعة بدائية ترجعك للأرض لو سرحت أو فتحت الباب لشوقك فانجرحت أو طرحت الورد فوقك أو سمحت الناس تشوفك وانت بتلملم كسوفك أو بتندب مرّة خوفك أو ظروفك والتعب
//
الحتّة دي جنب قلبي
اللي بيشبه قلبي الخالق الناطق.. بس عمره ما انتبه
إنهم نفس الشبه!
