تدوينة
محمد ربيع محمد | اتحاد كتاب مصر
قررت افصل تليفوني وانام
من غير ما اعلق على بوست
ولا اكتب لحبيبي غرام
غمضت عنيا وافكاري
عن ضي الصورة اللي واخدني
لشعاع الطاقة الممتد
لعوالم فتحت احضانها
لبراح النت المطلوق
بجواده اللي مالهش لجام
وعقول بتسلم مفاتيحها
على باب مجهول
وقلوب بيسيل منها حنينها
بطعم الشربات
ومشاعر سخنة ومشبوهة
لو بردت تفقد لذتها
وتهرب شحنة عواطفها
ف تحقيق الشوق
من غير ما تدل بانذار
ومشاعر صادقة ومكوية
لو صرخت تصنع
م التلج الصامت بركان
غمضت وكان النوم صافى
والذهن جناين طراحة
اوحالي بمزيد م الراحة
ف ثمر الأحلام
وف لحظة وهاتف صحاني
ليه سبت الهاتف شغال
