رسالة لمسافر

 أشرف عبدالرحيم | شاعر مصري

يا مسافر
و بتفني في صخر الدنيا ضوافر
ما اتحنت يوم
ولا دقت النوم من يوم ما سافرت
ما اقدرت يا واد
تنسي الاحباب
ولا دقش باب يفرح قلبك
ولا جاك زوار
محتار و الفكر يطول ليلك
وتلاقي اليوم
فيه الف نهار
جبار من يومك عرفاك
ما يهمك شي
لكن يا وليدي
الغربة مرار
مستني تعاود
تلقي عيال الشارع نفس الطول ؟!
و تلقي الجار نفس الجار؟!
من وين يا وليدي ؟
و انا كل ما اقولك عاود
بلقاك اتطول ف المشوار
بيضنا البيت
و دهنا المنضرة
و لصقنا حيطان الشقة
بورق الحيط
بالظبط تمام زي موصيت
و رفعنا عتبة الباب
ماشبعتش عاد ؟؟!!
ما ناويش ترجع ؟؟
دا ليلاتي يا ولدي بحلم بيك
و عنيا اتقلعت ف الشبابيك
و بقول يمكن
يمكن تشتاق لامك
و الشوق يرميك
نفسي افرح بيك
و اشوفلك حتة واد ولا بت
يقولوك بابا
و ينادي عليا يقولو يا ست
طب عارف ؟
من يوم ما سافرت
لاحضرت لا عرس لواد
ولا حنة لبت
ولاحتي طلعت ازور تربة
طب هطلع كيف و انت فغربة ؟!
دانا حتي الباب من غرية
ما قربتوش
بطلع وادخل من شرقة
فقلب الحوش
و اخواتك
اخواتك قالو جايبن نغسل خلقاتك
و بقالهم سوق بجمعة ما جوش
طب حتي ولاد الهرمة
ما يتكسفوش
و يراعو لسني
ما كفاية عليا انت يا ولدي
مزود همي
ماشبعتش تل معايا
وقال و قولنا ولح
طب خلي فعينك حصوة ملح
و عاود
عجباك الدنيا حداك قاعد
علشان قرشين و كلام فاضي
ولا لوش عازة
مستني تعاود تنصب ليا جنازه
الغربة يا ولدي لزوم الحاجة
و وقت العازة
مش لازم يعني
الشاشة الستة وتلاتين
و باعتلي عشية شيلة بطاطين
و مراتب مكبوسة حديد
طيب كان القطن التنجيد
و ماله التلافزيون الالوان
متبصش يا وليدي لفلان
ولا ولد فلان
خلي قناعتك فيك تكفيك
يكفينا و يكفيك يا وليدي
شر المتدسي
حلفتك بالله ما اتطلع حسي
و اتدله قوام
و اخيرا يا وليدي
لك مني الف سلام وسلام
أمك