من يوم البعد

 محمد بخيت | شاعر مصري

من يوم البعد ما زاد بينا
وانا عايش ضايع من غير روح
وبداوي جروح لقلوب تانيين
وبحس حنين لكلامنا اياه
وبتوه وياه واعشق اكتر
بسرح فيكي وبفضل افكر
وازاي اقدر انساكي ف يوم
واشتاق للنوم جوه عيونك
وابقى بدونك عايش ناقص
عايش مكسور محتاج يكمل
عايش بسأل طب ليه نبعد
وأفضل ابعد عن كل الناس
وبتوه واحتاس ف حاجات تافهه
والضحكه ف يوم قلبي ما شافها
من يوم البعد ما زاد بينا

من يوم البعد ما زاد بينا
والدنيا اسودت ف عيوني
والعتمه خلاص بقيت لوني
بقيت كوني وبقيت مهموم
وبقيت مهزوم ف حروب الفرح
أصبحت كجرح علاجه الموت
بسرخ دايما لكن ف سكوت
الصمت استحوذ على قلبي
وبقيت سلبي ف الإيجابيات
أصبحت شتات محتاج ليكي
وبتوه فيكي واستني جواب
وبدق الباب علشان حبيت
ياما اتمنيت انك تبقى
ونعيش مع بعض حياه تانيه
وتعدي الثانيه وانا ف قربك
وأفرد جناحاتي لفوق عالي
واكتب اسمك على كل سحاب
وارسم صورتك بنجوم الليل
وانزل للنيل اشرب منه
وارجع عطشان اشرب منك
ترويني بحبك وارجع فوق
واستني شروق عينك يطلع
ويهب نسيمك يحضني
طب لي بتظني السوء فيا
ويكون الجرح صديق ليا
وتكوني بعيده هناك وحدك
طب ليه وعدك أصبح كداب
أو لي سبتييني ف وقت الجد
وكويتي الجرح بنار وعذاب
وف وقت الحاجه لحضن حبيب
سجلت وجودك عندي غياب