شاعر كبير قرر يسافر من هنا للشمس

سعيد شحاتة | مصر

(في رثاء الشاعر المصري يسري ذكي)

يسري طلع للشمس يجمع ضيّ
عزموه حبايبه الطيبين على شيّ
يسري الحييّ الطاهر الموهوب
ابن القلوب بيجيب قصيده وجيّ
الشاعر ابن العدل مش بيموت
الشاعر ابن الحق دايمًا حيّ
°°°°
شاعر كبير قرر يسافر من هنا للشمس
مرّر إيديه بشويش على قلوب الجميع بمحبه واتحرّك لفوق
مشتاق وراح للي اتوهب له بشوق
يا ضي رايح للشروق وحدك بلا إنذار…
طالع على السلّم برجليك للنهار
وموضي أحبابك بشعرك م السما
كل اللي عارفينك هنا مستغربين
كل اللي شايفينك هناك مستوعبين
إنك ما كنتش من شمال ولا من يمين
لكن ملامحك رافضه كدب مُسَيلمه
ومسلّمه أمر الحياه لله وماشيه بنور
طالع على السلّم برجليك للنهار مندور
والعشق في عيونك بلاد وبحور
والدنيا ف إيديك توت وتين وطيور
شاعر كبير كتب الوجع في سطور
وفات المغرمين ع الدكه واتحرر من المضامين
ساب كافة العناوين بلا عناوين
غمّس سنين العمر بالقول والكلام الحلو والشعر الندِي
كان لما يمشي الشعر بعنيه يهتدي
والسكه من خطاويه تحاول تبتدى
إزاي كده يا موت ردي يا مفرّق الحواديت
ومقفّل الحوانيت
يا ضلمه بتخش البدن فتافيت تشكّل كهف
عمال بتلهف في الحبايب لهف وبترمح من الشبابيك
زي اللصوص دايمًا مخبي عنيك
يا شيطان وفارد ع البراءه إيديك
نرجوك ونسترجيك ونترجاك
شاعر كبير راكب ليم هناك
اسمه الندا والطل والنجمات
كل اللي عارفين قالوا شاعر مات
رغم انه طالع للسما يضحك
ويقرا قصايد الشعرا اللي عدّوا عليه
ويستوعب معاني عصيبه ع القلب الشفيف
تعرفش شاعر شعره طعم رغيف
وكلامه كله على الأحبه رهيف
شاعر في وسط المعركه حرّيف
يا صاحب القلب الشريف
م الصبح مش رايق كأن الدنيا بتحاول تكون أشكيف
وكأن كان فيه شيء مخيف ظاهر ومش باين
الموت كأنه حكومه بتعاين وتختار الجدع والحُر وابن الناس
إيه الأساس في الحكم… مش عارف…
بس إحنا نعرف إيه بنوله أساس
ترباس يا صاحبي بيتقفل وخلاص
وبيقتل الإحساس في قلب الموهوبين للطمي والذكرى
على فكره كلمة (صاحبي) دي صادقه
طالعه بعسل م القلب مش حادقه
رغم إننا ما اتسليناش على قهوه ولا مره
رغم إننا ما كانتش بينّا حاجات تقول أصحاب رغم إننا
ما اتخطيناش الحاجز المنصوب على باب الميدان مع بعض
رغم إننا ما قسمش واحد فينا ويّا التاني لقمة عيش
رغم إننا أصلاً ما نعرفناش قوي
ولا كان ما بينّا كلام كتير ولا ضحك بين قلبين وصدر رحيب
رغم إننا صاحبين غريب… وغريب
إلا إني حسيت إن أنا موجوع بشكل رهيب
وقعدت اقول شاعر كبير طالع على السلم
علشان يقف بقصايده للزعابيب
ويحارب القباقيب
ويغني غنوه تخلصه م الديب
طالع يجيب من فوق قصايد بكر
لكنه ناوي مع اللي سافروا يغيب
لمّا القصايد فوق شجرها تطيب
°°°°
هو انا مضطر أصدق واللا عادي
ممكن احزن واللا اكدّبهم وانام
ممكن استناك تقول شعر الليلادي
واللا يسري الليله صايم ع الكلام
كل يوم شعرك بيصرخ: يا بلادي
والبلد مش واخده بالها من الحمام
°°°°
شاعر كبير طالع يسلم ع السما بكفه الأبي
كاره كلام الكدب والزيف والحاجات الأجنبي
شاعر وروحه كما العيال المخلصه
(بيعيش عجوز ع المفترق ويموت صبي)