جنن سمانا فيروس كورونا
خالد جمعة | فلسطين
على دلعونا وعلى دلعونا
جنن سمانا فيروس كورونا
بيلعب معانا ويحاوي فينا
لا عندو ذمة ولا عندو دينا
من خلقة عطسة صار بيعدينا
وسكر مدريد ومع برشلونا
ممنوع تبوّس ممنوع تسلم
لحسن كورونا عليك يعلّم
وان عطس واحد جنبك يا معلم
افرك من جنبه مثل المجنونا
منشان الصحة وسر السلامة
هذا كحول وهذي كمامة
فراق الحبايب صاير علامة
ما بيني وبينك خلي مترينا
باطح أمريكا ومعها إيطالية
وطيت قدامو المناخير العالية
طرقات العالم منشانو خالية
يا دوب نوقف على البلْكونا
عاملي حالو عالَم حضاري
من خلقة بزقة أعلن طواري
مضلش بايع مضلش شاري
وخافت البلوزة من البنطلونا
ان كنك ع بسطة ولا ف حكومة
أو كان سلاحك نووي وجرثومي
عند الجدية القصة مفهومة
ما بينفع فيها غير الصابونا
إفهم يا عالم إنو الحضارة
مش بالغشامة ولا بالشطارة
دنيا مرجيحة دايم دوارة
بتوطي العالي كاين ما يكونا
