أنا الحارس على بابك

مختار إسماعيل بكير | مصر

أسيبك ؟ صدقيني محال
خلاص قلبي هوى الترحال
وغنالك ميتين موال
لعلك ترضي يوم عني

///

انا اللي بحبها مجنون
وانا اللي حلفت يوم ما هخون
وهي عندي كل الكون
وهي الفجر متحني

///

يا ست الحسن ما تحني
حبيبك داب ومستني
تحني عليه وما تضني
ولو تداريه فا في النني

///

انا الطير اللي عاش مكسور
انا الوطن اللي كان مستور
وهما اللي بنوها قصور
وانا اللي بحزني متهني

///

انا سيفك وانا الحراس
وانا قلمك وانا الكراس
وانا شيطانك الوسواس
تعالي وقربي مني

///

بنزرع والغريب حصاد
ويملى أرضنا الحساد
وبنضيِّع شقى الاجداد
وبنقول للصخور حني

///

خدي ولادك وضميهم
وفوق ارضك ولميهم
وان تاهوا فرديهم
وان طلبوا الغنى غني

///

انا الحارس على بابك
وانا سقفك وانا ترابك
فليه تقسي على احبابك
وليه تسقيني من حزني

///

انا الصوت اللي مش مسموع
وانا الضحكة اللي فيها دموع
ودايما في الغرام موجوع
وبكتب بالهموم فني

///

نموت لاجل الحبيبة تعيش
ونسكنها ولا تدريش
ونستنا لكن متجيش
ويتاكد هناك ظني

///

بحبك حب فوق الاوصاف
ولا في حبك بكون خواف
انا فوق مركبك مجداف
وسابق في الغرام سني

///

بحبك حب ما له حدود
وعديلك حدود وحدود
دا انا بحبك هكون مسنود
دا بعدك شيء مجنني

///

يا راسم دنيتي تفاريح
وانا وقلبك نصد الريح
وانا الواضح بدون تلميح
وانا اللي هواكي غيرني