بيني وبينك
شعر / أحمد رأفت /مصر
بيني وبينك
خطوة تايهة ف البراح
حالفة ما ترجع
إلا ما تجيب الصباح
وانا نور صباحي في سكتك
مش راح يعود
إلا ما ترجع ضحكتك
تطوي الجراح
قدري أتوه عن نفسي
واتغرب سنين
شايل على اكتافي الهموم
طاوي الأنين
دايس بخطوة حلمي
على شوك الطريق
باحلم أحقق وعد
مرسوم ع الجبين
قدري أكون رحالة
في براري الهوى
فارد قلوع الحيرة
في بحور النوي
بتاخدني آه وتجيبني أه
والليل طويل
والنار بتكوي نبض قلبي اللي اغتوى
يا فجر طال الليل
وعشش ع المدى
امتى تزيح العتمة
وتبل الصدى؟!
امتى هترجع
تبتسم بين الضلوع؟
وتزف لورود الحياة
قطرة ندى ؟!
