حلمنتيشي !
بقلم: عادل عدلي راغب | مصر
بورتريه للشاعر بريشة الفنانة إيمان حكيم | مصر
فيه ناس ع الفيس اول ما تپوست تلايككلك
وناس تانية شايفاك ظريف وبتضحكلك
^^^
وناس حابّه كلامك ومش بتعلقلك
وناس بس بتقرا وبتتجاهل پوستك
^^^
وناس ما تصدّق تمسك غلطة وتتلكك
وناس بتقول الخاص ممنوع وبتبعتلك!
^^^
سيبك م الناس خليك واثق قوي من نفسك
اكتب عبّر واختار انتَ اللي يليقلك
^^^
ان عجب الناس يبقي ياسعدك وده من بختك
وان ماعجبشي يبقي تنفّض كده اريحلك
^^^
واللي هيغلط في ثواني يبقي انفريندك
ومعاك يفضل اقوي سلاحك هوّه بلوكك
^^^
اوعي تحاول تِرْضي كده كل الناس فُكّك
احسن لك تقفل حساباتك علي فيسبوكك !
