يوم المرأة العالمي .. بالمحكية الفلسطينية
تركي عامر| فلسطين
بْيوم المَرا
وَالله لنهريكو فَصاحة وْثرثرة
وْعالمُصحف مْنحلِف
إنّو الحكي مَنّو تِجارة وْمسخرة
شي بينقرا
وبتقول ذكرى محزنة
وشي مفبرك وممنوع إنّو ينقرا
كل عام ونتي بخير يا إمّ الدّني
هذا بْتحيّة مزيّنة
بْآيات ألله دخل إسمو حرّرا
وْعالأرض نزّلها رسالة مْسوّرة
إنّو المرا مش بس حتّى نْنام
معها وبعد كم شهر بتخلّف
يمكن بنت
عا شكل إمّا جوهرة
يمكن ولد
طالع لبيّو باللّعب والولدنة
وهذا قصيدة حبّ لو تعرف
بأحلى كلام محبّرة
متل المنام مصوّرة
بأفخر حرير مبطّنة
ومزرّرة ومسكّرة
وباقي السّنة
بين الثُّريا وِالثَّرى
شتّان إسمو بيقلبو شتّام
وبيشقّع لْـ إمّ المَرا
مَرّة يا عيب الشّوم من قدّام
ومَرّة بسرعة من ورا
