بخاف عليكي.. بالمحكية المصرية

شريف أنيس | مصر

اللوحة للفنان محمد رضوان

بخاف عليكي بس مش بنطق
يمكن عشان العشق مش بالصوت
صمتي الحزين أوقات يكون أصدق
من ألف كلمه ع السطور بتموت
أنا اللي حاضر كل أحلامك
شاهد على الضحكه وع التنهيد
من بين جروحك صورتي قدامك
مرسوم ف روحك مهما كنت بعيد
أنا نص حزنك بس مش بيبان
علشان بخبي الحزن ف ضلوعي
إرمي الحمول هتلاقي فيا مكان
يساع حنينك حتى بدموعي
بخاف عليكي والعتب ع الخوف
محفور ف قلبي من قديم ليام
الصمت فيا والوجع ف الجوف
لكن عيوني طايره ليكي حمام
بحب فيكي قلبك الصابر
الوش يضحك والحشا مجروح
أنا اللي خدني الحمل مش قادر
ع الصبر وانتي لسه فيكي الروح
دليني مالك ساكته ليه ع الهم
وليه بتبكي العين ومش بتبوح
وليه تخبي الحزن جوه الدم
وكأن قلبك ميت كتاب مفتوح
وبحب فيكي بصتك ليا
وقت الوجع بسمعها من غير صوت
من طلتك بتعيش حاجات فيا
حاجات بتفضل حتى بعد الموت
محتار ف قلبك كيف يموت ويعيش
وإزاي برغم الوحده متصبر
قولي اللي فيكي وإحكي متخبيش
خبي ف عيوني دمعتك . هقدر
بخاف عليكي بس مش بنطق
يمكن عشان العشق مش بالصوت
صمتي الحزين أوقات يكون أصدق
من ألف كلمه ع السطور بتموت