شيرين أبو عاقلة.. طول ما في شهدا في قضيه

سعيد شحاته| عضو اتحاد كتاب مصر

هنبكي عليها يومين…
ونسكت.
وننساها.
ونستنى رصاصه جديده من سلاح العدو تسكن دماغ حد تاني…
عشان نبكي عليه يومين…
ونسكت.
وننساه.
المهم صفحاتنا على الفيس بوك ما تبطلش بكا
ولا نزيف
ولا نسيان.
وأسلحتهم ما تبطلش رصاص
والانتهازيين ما يبطلوش تصوير في الميادين العامه…
وبياعين الأخبار ما يبطلوش كدب
وكتبة التقارير ما يقفوش عن الكتابه
…..
وهي ما تبطلش ثوره
……… حتى بعد موتها
……
وإحنا ما نبطلش نسيان
ورصاص العدو ما يبطلش ……
……
طول ما في شهدا
في قضيه
وطول ما في قضيه
في أرض
وطول ما في أرض
في رصاص
وطول ما في رصاص
في نزيف
وطول ما في نزيف
في بكا
وفي ناس بتفتكر
أكتر ما في ناس بتنسى
وفي حقيقيين أصدق بكتير من صفحات الفيس بوك
…….. بيستنظروا دورهم
……..
معظمنا للأسف بقى صفحه عند مارك
ومعظمهم لسه واقف في الشارع يجمع طوب عشان يرسم بيه خريطه جديده
غير اللي أسياد مارك رسموها وبعتوهالنا مشطوب منها اسم فلسطين
ومرسوم مكانها رصاصه في دماغ نبي
ومشنقه لرب
ومقبره جماعيه لملايكه