آخر ربع روح
شعر: نور الدين الشريف
ماكانش صعب آخد قرار
إن دي لازم تكون ..
آخر قصيدة
الشعر بالنسبالي أصبح مشكلة
مافضلش منه فيا غير
صوت الوجع
حتى الشعور خجلان بحكم التعرية
ومفيش حلول للمسألة
هاتكتب إيه ..
و الدنيا قلبت مهزلة
عدت مع الجيل المدان
آخر حدود الهرتلة
كل الورق بيشف روحي
فاتطلع الرسمة اكتئاب
ضيق الحياه ناطط في كل التركيبات
تكتب لمين ..
و الكل رافض يسمعك
عايش في وسط الناس
بآخر ربع روح
كائن غريب كل الشوارع ترفضك
وقت التعب
كل القهاوي تطردك
فخلاص بقى
سيب الكلام للفرحانين
شوف سكتك
اقطع لسان الشعر جواك .. إخرسه
قبل الزمن مايكمل الدور الممل
و يسكتك !
