اضحك .. أنت مصري
ناصر أبو عون
– قبل وفاة أستاذي عبد الوهاب المسيري بشهور حاول إقامة ندوة مخصصة للحديث عن (النكات) وتحليلها؛ لكن تمَّ إلغاء الندوة لدواعٍ أمنية فقال معقبا: لا أتصور نظاما (يخشى) إلى هذه الدرجة من النكتة!
– النكتة دفاع عن (الذات) وحالة (مقاومة) وتعبير عن (الرفض) وعدم (التقوقع).
– النكتة (السياسية) في أوطان (الاستبداد) تعبير أولي عن حالة خاملة أو متردية (للحرية).
– النكتة (مؤشر) نوعي وحقيقي لدرجة (القهر السياسي) ومستوى (الفساد).
– النكتة (تنفيس) عن غضب (منضبط) وتعبير عن (سخط عام)، ومحاولة مواجهة (الظلمة) ولو بفانوس صغير، أو( شمعة) لا يكاد زيتها يضيء.
نكات من القاهرة 2011:
– (بلطجي) سألته قناة الجزيرة (إنتوا ليه بترموا مولوتوف علي الشباب)، فرد قائلا :” العيال دول بيرموا علينا قنابل “بلوتوث”)
– شهود عيان في أروقة وزارة التربية والتعليم تفيد بأنه قد تم تأجيل امتحانات الدور الثاني إلى أجل غير مسمى، معللة هذا بأن النظام سقط وعاوز وقت عشان يلحق يذاكر.
– عقد الريس جلسة مع وزير الداخلية السابق وقال له محتدا: منعت الحشيش يا فالح؟ أهو الشعب صحصح.
– مبارك بعد ما مات قابل السادات وعبد الناصر، سألوه: هاه؟ سم ولا رصاص؟ رد عليهم بحرقة وقال : فيسبوك!
– أمنية واحد مصري: يا ريت مبارك كان ضربنا إحنا الضربة الجوية، وراح حكم إسرائيل 30 سنة، كان زمانهم بيشحتوا دلوقتي!
– تحية السلام بين الشباب في 2011 هي “الثورة عليكم ورحمة الله وبركاته” !)
لافتات من ميادين التحرير:
– طفل يحمل لافتة تقول : (ارحل بابا فاتح قناة الجزيرة طول اليوم وأنا عايز أشوف كرتون.)
– ارحل.. الوِلِيِّة (عاوزة تِوْلِّد) والوَلَد (مش عايز يشوفك).
– ارحل عاوز أتجوز.
– ارحل (مراتي وحشتني) متزوج من ( 20 يوم).
– ده لو كان (عفريت) كان (طلع).
– لو ما (استحمتش) النهاردة في بيتنا.. هاستحمى يوم الجمعة في (قصر الرئاسة).
– رابطة نجارين مصر يسألون الأسطى مبارك: ما نوع الغراء الذي تستخدمه في الكرسي؟
كلمات ثورية على وزن أفلام كوميدية:
(نحّيني شكرا/ كلمني شكرا) ، (يا دنيا ياحرامي/ يا دنيا يا غرامي)، (حب في الدبابة/ حب في الزنزانة)، ( يا أنا يا حسني / يا أنا يا خالتي) ، (إنها حقا أجندة محترمة / إنها حقا عائلة محترمة)، (خالتي أجنده / خالتي فرنسا)، ( شورت وأجندة وكاب / شورت وفانلة وكاب)، (بلطجية في كي جي تو/ حرامية في كي جي تو )، (مطب رئاسي / مطب صناعي) (اللعب مع الإخوان/ اللعب مع الكبار)، (اللي بالي ماشي) ، (الواد محروس بتاع الوزير/ الواد سليمان بتاع الرئيس).
ماذا قال العالم عن ثورة (25 يناير 2011) في مصر:
– الرئيس الأمريكي باراك أوباما 🙁 يـجب أن نربي أبـناءنا ليصبحوا كشباب مصر).
– رئيس وزراء بريطانيا ديفيد كاميرون: (يجب أن ندرس الثورة المصرية في المدارس).
– رئيس وزراء إيطاليا سيلفيو برلسكوني:( لا جديد في مصر فقد صنع المصريون التاريخ كالعادة).
– رئيس وزراء النرويج ستولتنبرج (اليوم كلنا مصريين).
– رئيس النمسا هاينز فيشر(شعب مصر أعظم شعوب الأرض يستحق جائزة نوبل للسلام).
– وزير الخارجية الألماني فستر فيله (أتطلع إلى زيارة مصر والحديث مع الذين قاموا بالثورة).
– السفير الألماني بالقاهرة (الثورة المصرية تشبه ثورة وحدة ألمانيا منذ 20 عاماً فقد حافظت على كونها سلمية).