القدس
محمد ربيع محمد | مصر
من غير هواها ازاي نعيش |
أو حتي تحلى لنا حياة |
وازاي يطيب ف الدنيا عيش |
والقدس حن لطوق نجاة |
وازاي نقول صعب ومفيش |
والقلب ليها براح سماه |
عاوزين صلاح يرجع بجيش |
واحنا اللي ضيعنا الصلاة |
***
القدس نبض وركن دين |
شمس طالعه لشوق نهار |
عطر الأصالة والحنين |
ولا همها ابدا حصار |
القدس محتاجه ل ايدين |
تحمي الحما لابعد مسار |
يا نعيش علامه ف كل عين |
يا نموت فدا دين الإله |
***
طعم الحياه مر ومذله |
والخوف وجع مالي المكان |
وياما هلت من اهله |
والأرض سارقها الكيان |
جسم الوطن موجوع بعلة |
ولا فيش مع الغاصب أمان |
مش محتاجين ابدا ادله |
والحق صوت واضح صداه |
***
القدس جغرافيا ومعالم |
عربية من غير أي زيف |
وبريق عيونها حزين وآلم |
وشجرها ما بيعرف خريف |
اخر زمن وما حد سالم |
ومفيش مكان فيه للضعيف |
مؤمن بوعد الله وحالم |
بالنصر يعلي ف يوم نداه |