دكانة عم سيد
محمد ربيع محمد | شاعر مصري
دكانة عم سيـــد
شغلتني كتير معاها
بتصحي ف كل سيد
نسمة سحر ف هواه
لها سن جميل وباسم
وعيون زي العذارى
وعشانها القلب راسم
قمرة تلم الحيــارى
بتبيع سكر محبــة
من جوة القلب دايب
وغرام مخلوط مودة
متعبي إن كان وسايب
وتبيع ويا الحـلاوة
كم ضحكة معطرين
ريحة نعناع نقـاوة
من يد العطــارين
دكانة رفوفهـــا شالت
ف قلوب يامــا كتيـر
رقت م الشوق ولانت
وكأنه دا توب حــرير
ف الشمس بتبقى ضلمة
على قد ما ترمي عيـن
وسبيل عطشان وقلة
لقلوب الطيبيـــن
بتبيع للناس دواهـم
حبة حب وصراحة
والصبر اللي دواهم
يد تطبطب براحه
دكانة عم سيــــد
مفروشة ورود وحنة
ومحبة عم سيـــد
خلت نواحيها جنــة
