مقالة باللهجة العامية.. الله يجبر بخاطرك

سجى مشعل | فلسطين المحتلة

الله يجبر بخاطرك: بحِس إنّه أحلى دعوة ممكن تسمعها “الله يجبر بخاطرك”، قديه بحسها بتواسي الواحد من جوا قبل ما ترسم الابتسامة ع وجهه من برا، مرة حكتلي اياها وحدة ساعدتها، ومرة حكالي اياها زلمة كبير بالعمر لانه اشتريت منه. وفي كل مرة منهم كنت أحس إنه هاي اول مرة بسمعها، قديه الدعوة ممكن تكون هدية إلك، وقديه ممكن تكون الدعوة مَدعاة لإنك تضل مبسوط طول نهارك، وكيف إنه الله بسخرلك ناس تدعيلك، دون اي تخطيط مُسبق، أنا بعرف إنه كلشي حلو سببه الله، وكلشي حلو بصير او صار معي الله الي كان مسخرلي اياه عشان يطلع بأدق التفاصيل وخلال أصعب المواقف. ومعنى إنّه الله يجبر بخاطر الواحد هو إنّه كلنا خواطرنا مكسورة سواء من زمان كتير، او جديد، كلنا جوّاتنا فراغات معيّنة مش ممكن حد يسدّلنا اياها، لا صحاب ولا غاليين، بس الله، الله وبس