أخدت الضحكة معك

خالد جمعة | فلسطين
إلى باسل اليازوري بعد ثلاثة وثلاثين عاماً [استشهد باسل في بداية الانتفاضة الأولى في كانون ثاني 1988]
°°°
كيفك حبيبي؟
لساتو سنك بيتبسّم للندى؟
لساتك ما بتكسف حدا؟
شفتك مبارح في شارع حارتنا
بتلم الشجر في أحضانك
كل بيارة كانت بيارتنا
وكل الغزلان غزلانك
إيدك مدارج عصافير
وعيونك شلة نواطير
تضوي الكون لو عتّم
وتسمي باسم المخيّم
وتحرس زوايا الروح والجوري
تحنحن على جناحات الدوري
كنت تبكي كأنك بتغني
وتعطيني كأنك ماخد مني
كل الصبايا بكن لما شافنك
وشَمِن على زنودهن ضحكة سنّك
قالن: أصل الموت بينقّي
وانت استعجلت: قلت الوطن حقي
وكان رصاص الليل يتقصّد
ويترصّد
كوم سنين مرق على جلدي
ولساتني بحسك قاعد حدي
تسألني عن اللي صار
عن الأرض والدار
كان نفسي أجاوبك وانا بضحك
بس انت اخدت الضحكة معك
وضلينا في كل لحظة بنسمعك
كيفك حبيبي؟
لساتو سنك بيتبسّم للندى؟
لساتك ما بتكسف حدا؟