السما مفتوحه على فلسطين

سعيد شحاتة | شاعر مصري

شجرة كافور تشبه عيال وبيوت
تشبه عروسه ف بيتها بالطرحه
كانت حزينه وهي نازله تموت
بس الكلاب طايرين من الفرحه

………..

تيأس… تفوق…
انا لسه فيّا عروق بتنبض بالحنين
جوايا قلب كما الرغيف السخن
… متحني ساعة الفسحه بفلسطين
………..

اللي قتل رمز العروبه وحَبْرها
وعجن ملامح أمَّه بدموع صبرها
واغتال بعزم ما فيه حسابها وجَبرها
جاي النهارده بيحتفل على قبرها

……….

كل الكلام فارغ إذا ما ضربش نار
كلّ الحمام بيموت إذا اتحاصر
فاضرب رصاصك وسط أيّ حصار
أنت العزيز / الظافر / الناصر
النهر مش هيفيض غنا وأشعار
والأرض مش هتعود بناس قاصر

……..

الظلم بيرمح ويدبدب برجول الفيل
واقف بيشاور للبهاليل
ويطبطب على كتف الزغاليل
عَجَل الظالم زي الزمبيل
مظلوم والروح هايبه الأرواح
والعين دايساها رجول الليل
كرباج ع الكتف يقويني
كرابيج الظلم مداها طويل
ما تخافش من الأوجاع واحلم
حلمك في القلب غنا ومواويل
بنغني بصوت مبحوح وهزيل
وننام واقفين على هيئة خيل
وبنشرب حزن دموع كالسيل
……..

شرايين بتزق الضلمه الدون تطرح قناديل
ننزل من بطن النور تراتيل
والمارد بيدوس ع الشارع
وبيكسر ف ضلوع العياييل
وإحنا اللي شربنا الخوف براميل
………

ماشيين بنعد ورود النيل
خلاخيل بتدق على الأسفلت
……

عشان ما تبيع للناس خلاخيل
رغم إن الفيل كان في المنديل
العود مصلوب والقلب هزيل والحيل مهدود
جسر الأحلام دايمًا ممدود
نفَس المسكين منهم معدود علشان مسكين
بننام واقفين فاتحين ضلفة بكره الغايب
ألعب بالواد اللي مخبيه
واللا أنزل في الدور بالشايب؟
دكتور البواسير امبارح قال لي ف قلبك خلخال دايب
سوق الرمان فيه كمترى وسوق التفاح فيه توت طايب
والمارد رغم الطول خايب وعنيه خايبين
بيشوف الراجل عود ياسمين والست عودين
والطوب أشباح والناس ميادين
ويشاور للنايمين بالموت علشان يهرب منه الصاحيين
خش بقلبك مصلوب يا حزين
واتحدى بكل قواك الخوف
الخوف بيخاف م البني آدمين
زي الشايلين موت في فلسطين
لو كان الظلم قيراط خطيه
وازرع نور فيه لو كان فدادين
العالم أصبح ليه فجأه سراية مجانين
والعين ما بقاتش إزاي بالعين
وبتاع الزيت بعد التعديل بقى بياع دين
وبتاع الدين بيبيع جنّه
اليوم لما بيفلت م الإيد
……

زي اليوم لما بيستنى
مش فارقه كتير
السير بعد الأشباح ما تقوم
بيخاف ويخبّط في المواتير
والعالم بنت بنوت طازه بتسرح بفطير
والشمس بتحلم زيّي تطير لكن بتخاف
مين اللي اتدارى ومين اتشاف
غمّست العمر كتير بالحاف
واهي ماشيه خشاف والعالم عال
جدع ابن حلال
مظلوم جايز لكن شيّال
عامل لحياة الناس إحلال
باحلم رغم إن الحمل جبال
والسيرك كبير والموت أميال
والفيل بيحارب في الجَمّال
عمال بيهزّ ويتمايل
واحد بيقول: لأ مش قايل
والتاني كئيب وبيتحايل يلفع ويشيل
الخيل مظلوم جوه الاسطبل
كرابيج الظلم تهد الحيل
والصرخه صهيل
فاصرخ جامد
وان سألك بياع عن اسمك
قول للبياع: راضي وحامد
واتعامد زي الشمس الصبح على الماشيين
الخوف بيخاف م البني آدمين
والشِّعر بينزف بفلسطين
والكون كوانين والعه ببنزين
صدّقني يا مين… العين عاميه
والنار على جلد الناس حاميه
وبلاد الخوف ناميه وباميه وطارحه مخدّات
سجّل كما قال محمود درويش
أو أقول لك هات كشف الأموات
وتعالى نغني التعلب فات ونحدّف ورد على الميادين
الخوف بيخاف لو لقى أشباح
وبيوتنا اتهدت في فلسطين
والشعرا مازالوا بيتخانقوا على هباب الطين
الفاهم يشرح للفاهمين
والغاوي يطبطب ع الغاويين
والساكت يسمع م الساكتين
الدنيا ف آخر الفيلم كمين
وحصان وحصِين للركيبه
لو مخلة روحك مش سايعاك
ارميها وراك للهلّيبه
العيبه اتعكست في القواميس
والكون متعبّق بالجواسيس
والأحلام قلبت على كوابيس
والكيس مليان همّ وخيبه
والدمّ مزاج الشريبه وحبر القوانين
والسما مفتوحه على فلسطين.