ماكانش اتفاقنا

عبد اللطيف نصار | مصر

إهداء إلي روح شقيقي الأصغر المغفور له بإذن الله: الشربيني نصار المتوفي يوم 12مايو عام2011

ماكانش اتفاقنا
تبدل ورقنا
في يوم الامتحان
وترمي الإجابة
وتخرج بسرعة
وتركب حصان
وتظبط ركابك
وترخي اللجام
وأنادي عليك
تداري عينيك
تضيع في الزحام
وأجري وراك
وتبعد بعيد
ماكانش اتفاقنا
تسافر وحيد

•••
مش احنا اتفقنا
هتعمل جواز
عشان كان في نفسك
تزور الحجاز
وتطوف وتسعي
وتقضي فروضك وكل المجاز
وتقرا ياسين
في مقام إبراهيم
وتختم صلاتك
في حجر إسماعيل
وتقضي النوافل في حضن المدينة
وتشرب محبة
في روضة الحبيب
وتلمس بيبانه
علشان تطيب
وتدعي لربك
وربك مجيب
تقوم كدة فجأة
تغيب في المغيب
تسيبني لوحدي وترحل بعيد
ماكانش اتفاقنا
تسافر وحيد

•••
ماكانش اتفاقنا
تسيب النزيف
يطرطش شفايفك
وإنت النضيف
ماكانش اتفاقنا
تصبح ضعيف
•••
مش احنا اتفقنا عالمستحيل
بإنك تعيش لعمر طويل
مش احنا اتفقنا
في قعدة رجال
هتفضل معايا نربي العيال
وتفضل بصحة عريض وطويل
ماكانش اتفاقنا في يوم عالرحيل
ولايوم تسيبني وترحل بعيد
ماكانش اتفاقنا
تسافر وحيد

•••

ماكانش اتفاقنا تغيب في السكوت
ماكانش في حسابنا إنك تموت..
وإنت الحصان
ودايما بتكسب أجدع رهان
ماكانش في حسابك
يكون سرطان
يفرتك في كبدك
ليل أو نهار
ويطعن في بطنك آلام تبقي نار
ماكنتش مصدق
وعامل عبيط
ماكنتش مصدق
وعامل حويط
وكان هوه يهري ويشرب دماء
ولانافعة لقمة ولاحتي ماء
ولا حقنة نافعة ولا برشام
ولا دمعة تشفي ولا أحزان
ماكانش في حسابنا يكون سرطان

•••
وكنت تحاول
تقاوم،
تساوم
تعافر
تسافر
ولاكنت كافر
وترمي المتاعب
وترجع إليك
وتقلت جفونك
ودلت إيديك
ونشفت شفايفك
وغارت عينيك
وكان باقي لسة كرامة لديك
ورفعت إيدك
وقلت الخلاص
ورايح لبيتي
مسافر خلاص
ربي ناداني
هالبي النداء
ومؤمن بربي
رضيت بالقضاء
وراضي بحكمك يارب السماء
وزادي رضايا ودم الشهيد
وجايلك لوحدي وهابقي سعيد
مع أنبياءك هاعيش الخلود
وغمضت عينك في لحظة سجود
ولمست إيدك لسعني البرود

•••

ماكانش اتفاقنا
تغمض عينيك
ويسكت لسانك
وتبرد إيديك
وتضحك شفايفك
وباين عليك
ويربطوا وشك بمنديل حرير
وتغطي جسمك ملاية سرير
وإنت اللي دايما بترفس غطاك
وجاءوا في لمة ومية كتير
يوضوك في صحبة كأنك أمير
يلفوك بخرقة ما فيهاخيوط
وتخرج بحرقة مع الزغاريط

•••

ماكانش اتفاقنا يكون الخميس
وتقلع ذنوبك وتلبس عريس
وتتشال مرابعة وإنت الحصان
وتجري بسرعة لدار الأمان
وزادك رضاءك ودم الشهيد
ولابس بياضك ورايح بعيد
وجينا بسرعة لمسجد جديد
وقفنا نصلي بدون سجود
وشلنا الأمانة لقبر وليد

•••

وأجري وراك
أنادي عليك
ونفسي أبوسك
وألمس إيديك
سمعتك في ودني وصوتك حنون:
فصبرٌ ياعبده
فصبرٌ جميل
مسيرك تيجي لي
ولوبعد حين
سامحني ياخويا
نسيت اتفاقنا
ومهما افترقنا
لقانا قريب
ماهوانت اللي ليا
وإنت الحبيب
مش احنا اتفقنا هنفضل حبايب
وان كنت حاضر تشيل اللي غايب
سلام ياحبيبي ياعايش وحيد
وتعالي زورني ولوكل عام
وهات لي محمد ونورا كمان
واقرا لي فاتحة وسورة ياسين
وازرع لقبري عودين ياسمين
وأوعي ياعبده تفضل حزين
مش احنا اتفقنا نكون مؤمنين
سلام ياحبيبي ليوم اليقين
خلاص اتفقنا؟
قل لي:آمين.
آاااامين.