شعر شعبي

مالك البطلي | العراق

چَم دوب أموت عليك چَم دوب
مامِش هِوه وتجيبَه الدروب

فَرفح دليلي بنص الغروب
لا والتكتلَك ظال مَصلوب

غَم العُمر من كون مَدفون
أي والعَليهم تذرف شلون

بالكاس دير فصوص العيون
حِزن الشِته يرّادله متون ..

يا جَتف ضم الحيلَك متاع
هَدْهِدَت متني چفوف الوداع

لَسّاع ثاري الهَجر لَسّاع
عُمر السفينة بيد الشراع

غَن ياگَلب من ينحَب الريل
يَشواية الله إِعله التماثيل

ثگلَن هدومي من المِراسيل
وضِحك الصور بالفاگِد يعيل

مَچفية روحي إعلَه التِصاوير
ليل العِشگ جَمرة تنانير

مذبوح شوفي ذَبحة الطير
مَستور يا دَمع النِواعير

بخيالكُم ذايه واغَني
ومنّ الضِحك مَحروم سنّي

ألا وين أَظل بالشيب أَحَني
كون المِري تنزاح عنّي

تَعبني باچِر مادري شضام
هَلبت يِذب عن وَجهه اللثام

مَجبور أسامركُم بالاحلام
مَفطور گلبي فَطرَة الجام

حَگَّة الجِفن لو دَر عَلي زيج
طَرّ الشِفاگ وما بِلع ريج

بالحَسرة شوفَتكم توافيج
زَحمة الهُوه ينْجاب بالضِيج