ارفع راسك فوق
سمية صالح الجعفري | مصر
ارفع راسك لفوق ..
واوعاك تنكسر ..
خلي اللي نفسه يشوف وقعتك ..
بوقفتك يتفرس ..
الدنيا رحايا ..
وياما فيها هتتهرس ..
بربك و نفسك اقوى ..
عمرك في الطين ما هتتغرس ..
بعد كل وقعه اصلب ضهرك وقوم..
نضف العَبلّ اللي غطى الهدوم ..
وارسم الضحكة على وشك ..
خليك بالأمل مزيون ..
الحزن يا ابني ما له لزوم ..
كل شدة بتزول وما تدوم ..
عافر و ارمي تكالك ع الرحيم ..
واوعاك تتعشم في حد في يوم ..
ده مهما صان هيجي يوم و يخون ..
الوعد ما بيصونه إلأ أصل القوم ..
و دول الزمن منهم محروم ..
يا دوب يتعدوا على صوابع الإيد ..
اكتفي بنفسك واقوى بالحي القيوم ..
دول زادك لحد ما قيامتك تقوم ..
حاوط نفسك بقلبك و عَلِّي السور ..
وقٌربك م الناس ع القد ..
سلام سلام ومن غير كُتر كلام ..
ولو حد إحتاجلك في يوم ..
ساعده و رجعه لمكانه تاني يوم ..
الود من بعيد لبعيد بيدوم..
