بكلوريا الدم.. قصيدة بالدارجة العراقية
محمد زكي| شاعر وكاتب عراقي
وانه اراجع وانه راجع
شفت أصعب جثه ممدوده اعله شارع
وبيها تعداد الرصاص
فرع واحد ردت اتركه
مو صعب بس بي جوامع
الموت جان اول سؤال
وحله دم طفله يتيمه
السؤال الثاني بيت وجن خرابه
وحله جان نجيب غيمه
يا وزير الدم تعبنه ونتهينه
هاي رابع سنه اعيد الامتحان
امتحان سبايكر أسهل علينه
والسؤال الثالث أصعب
جان منطوق السوال
(كم عدد صور الشهداء في العراق)
والسؤال الرابع المامر عليه
جان منطوقه الغريب
قسمة ٣ عوائل
على شاب يريد يخطب
كلهم أرقام انفجار
ولازم الناتج شهيد
السنه التجبل راح اعيد
خاف يتغير سؤالي والعوائل
هم تزيد
بعد جم جثه وشهر
بعد كطعت رجل جندي وايد كاسب
والتمس بينه القهر
صنطه علنوها النتايج
بيت ابو البلمكبره وعايف جهاله
بيت ابو الماتدري مرته شصار حاله
بيت ابو المستشهد وباكوله ماله
دور ثاني تروح تمتحنه عياله
ونمتحن كلنه لجل تبقه الحثاله
