في مثل هذا اليوم.. بالمحكية الفلسطينية

‏تركي عامر | فلسطين

في مثل هذا اليوم
عشرين من أيّار
إنتي وأنا
كنّا وْلاد زغار
وتا يحرز المشوار
قمنا تجوّزنا
عا سنّة المختار
شَبّين خلّفنا
الأوّل “حسن”
بعدو “وليد”
نهار حدّ نهار
وبنتين من بعدون
الأولى “أسيل”
ومن بعدها “راية”
من أجمل الأزهار
وْلاد القلب كبروا
وبكّير صرنا كبار
وتا يرجّعونا زْغار
جابولنا هْديّة
أحفاد سبع قْمار
ألله يخلّيهون
ويحمي أهاليهون
كل عام وحنا بخير
ونعيش بعد كثير
إنتي وأنا بهالدّار
بعدِك صبيّة
وما صرتْ ختيار
لو صار شو ما صار
ليكي بنت عمّي
نشا الله بجيل الجاي
تلاقي حدا
أحسن ألف مرّة
من حضرة المِحتار
ما بين جنّة ونار
ويكون يا ستّي
شي شيخ وبيفتي
ومالو علاقة بالحبر
وبمحنة الأشعار