شعر: أحمد عبد الموجود الشيخ| مصر
شايل أعباء العالم على كتفك
والعالم ندل ومتخاذل
ولأن الكون ف صراع دايم
ولأن الأيام بِتواصِل
فأنا قررت أخلِّد ذِكراك
وأكتِب من وحي الحاصل
كان عايش هنا حد خيالي
بيآمن للناس بالجملة
بيوّلِف ع الإنسان تِماً
بيحب حاجات من نظر الناس..
قد تبدو لا تُغني ولا تُسمن
أنا عارف إنك إنسان طيب
إنسان حُر، وإنسان إنسان
بضمير ومبادئ حَيه
وسلامة جوفك حتمية
روحك فضفاضه وقلبك دفيان
إنسان تِدخله مهموم
تطلع والضحكة مابين ودنيك
تدخله فاضي
تطلع والورد معبي إيديك
إنسان زاهد كل الأشياء
وملازمه القهر
بيحب الدنيا على استحياء
ويحب البحر
بيحب الدَخلَة ف أغنية
بيحب الورد
بيحب الهوا في الفجرية
ويحب البرد
بيحب الألوان في المطلق
ويحب الكاب
ويحب الشاي لو بالنعناع
ويحب كتاب
جواه الصوت مسموع عالي
بيهز ستاير رئتينه
والعالم أخرس كالعادة
وبزيادة يكتف في إيدينه
كام مرة بيبكي الناس ؟
كام مرة بكوه!
كام حد اتمد ف ضلعه وداس؟
كام حد باعوه!
كل ده والإنسان إياه لساه..
ماشبعش من التخبيط
إنسان إن شئت تقوله: عبيط
