الـ مفيش
خالد عاطف أبو العزم | مصر
فى البدء .. كان ال مفيش !!
وف النهايه .. ال مافيش !!
وَفًر عليك الجُهد ف اللعنه
ملعون أبويا ..
يا حضرة الدرويش .
وقت الميلاد ..
الهون يجوز يتدَق .
مَولِد موافق ..
واللى رافض .. لأ
الزور مسدس .. بس كاتم حَق
والحق ميت لسّه فيه الروح
لازال ب يرقص رَقصة المدبوح
الأُضْحيَه من غير .. لا .. عيد .. ولاوقفه
وسلاح ب حَد بليد ..
ب يشبِه سقفه .
على أى حاجه ..
من الحياه .. للموت .
ملهاش وجود إلا مجرد صوت
يشبه لهُاث الكلب وقت العطش .
أنا كنت ماشى ف زحمه ..
قلبى اتلَطَش .
مابقتش أحس الَّا بأثر رَجعى
أغنّى ليكى .. ب شِعر من وَجَعى
والعَن ف بيع العَهد والتسليم
لأى حَد بدون لا قيد ولاشَرط
والعَن ف تقديم الحياه للخَرط
وبيع بشر .. أو أرض .. بالقطعه
والعَن ملك شطرنج ع الرقعه
قَدّم عساكرُه ف عز وقت الوغى
وعاش وراهم ..
بس .. عيشة أغا .
حارس وَفى على متعة الأسياد
أنا ليه مُصَمم أحكى ف ال مِتعاد
ل خَلق ب تراهن على جنونى ؟
ح ابكى عليهم ؟ ..
هُمَّا بَكّونى !!
ومشيوا بيّا ف زفّه للمدبح
دعوا عليّا .. إلهى ما أصبح
وان عشت لا أكسب ولا أربح
ولا اتقبل .. ف الأرض .. أو ف السما
قالوا لي .. ليه فكَّرتنا بالعمَى ؟
وبجِلدنا ..
– إللى اتنحَل م الخيش – ؟ .
مادام بدايته مافيش
لازم نهايته مافيش
وَفَّر عليك الجُهد ف اللعنه
ملعون أبوه .. يا حضرة الدرويش .
____________________
هامش:
أغا .. مفرد أغوات .. وهم العبيد الخصيان الذين كان الملوك يستخدمونهم لخدمة وحراسة حريمهم فى المكان المخصص لهن فى القصور الملكيه .. وهو ماكان يُطلَق عليه الحَرملِك .