أمى
مدثر الخياط | مصر
عيدك ياأمى
بيفكرنى بأول مره
أهديكى هديه
كنت صغير
كنت يوميها
فى الابتدائيه
كانت طرحه
كانت الفرحه
ماليه عنيكى
بوستينى ياأمى
وبوست إديكى
يومها سألتى
جبت منين الطرحه
ياواد؟
قلت أنا ياأمى
من تحويشتى
ومن مصروفى
فاكر يومها
رغم الفرحه
صعبت عليكى
قلتى ياولدى
تحرم نفسك
تاكل لقمه
زى زمايلك وتحوشلى
لأجل اليوم
ماتجبلى هديه
وتفرحنى
فين مصروفك
بس ياولدى
انت بتاخد
غير تعريفه
كنتى واعيه
وكنت حريصه
كنتى تخافى
من ربك موت
والغلطه مش سهل
تفوت
كنتى تصلى الفرض
تمللى
وبتدعيلنا وتدعى
لأبويا
ألفين رحمه عليكى
ياأمى انت وأبويا
لسه كلامك
جوه فى ودنى
بينبهنى
أنا هديتى صح
ياواد
لماتجينى فى يوم
وتقولى ياأمى
نجحت
