وانجرَح موّالي.. بالمحكية الفلسطينية
تركي عامر
يا مُرّة المُرّات
لا متل ما قْريتي
ما غْلِطِت بالإملا
مش مُزّة المُزّات
أَيْوَنْ يا عفريتِة
ولا حلوة الحلوات
مُرّة وألف مُرّة
مِنّك ما شفنا شي
إلّا حكي مْعَرّى
وِوْراق مصفرّة
لا بايع بترضي
وْلا بيقبلا شَرّا
مَرّات
يا مُرّة المُرّات
بخطر على بالي
قلّك بَلا تشفير
كلمة عن حْوالي
لا مْواخذة مِنّك
عَنْدِين هالحالة
عا دين هالحكيات
وتا أشرح الكلمات
عالسّكِت إهدي شويّ
وِتْلقّحي بالفَيّ
والله تعبت كثير
من ثرثرة ريحي
عا موقدة روحي
غنّيت تا انبحّيت
ما نفعت القرفِة
وْلا سكّر الفضَّة
عَنْدين هالحِرْفِة
غصّة بكل عضَّة
غنّيت تا انبحّيت
وانجرَح موّالي
من مهنة التّفسير
وعا مفرق الصّدْفة
من محنة التّقشير
وبعدو العتب عالي
والله تعبت كثير
من دقّ راس المَيْ
بالحيط تا يفهم
ومن دكّ بيت النّار
تا يقوم يتعلّم
إنّو الفلم مشغول
بحروف محتالي
والبطل عمّا يقول
كلمات بتلالي
قوس النّصر
بعدو بيحلالي
لكن مانعني بْسوق هالحالة
مش بسّ إنّو هالهوا ملوّث
وعالأرض بتخوّث
عزّة نفس عالي
وإنّو السّعر
متل الشّعر غالي
