أوراق الخريف.. الأُرجوحة (٤)

شرين خليل | مصر
لم أكن أتوقع أن تنجح الخطة وأن أكون بهذا الذكاء بعد فترة الغباء التي عشتها وأنا لا أرى حقيقة هذه الفتاة على الرغم من تحذيرات زوجي وابن عمتي..
أما الآن فأنا مندهشة من طريقة تفكيري كيف خططت لكل ذلك وأتقنت الآداء ..
تناسيت تعليمات أبي وإرشادته وتوصياته بأن أفعل الخير دوماً
ولم أُلبي إلا نداء نفسي ورغبتها في الإنتقام إرضاءاً لغروري.
فهل أنا حقاً مثل الأرجوحة كما أخبرني هشام من قبل ؟؟..
لن أفكر ولم أفكر وسأفعل مايرضي غروري سأُلقنها الدرس فهي إنسانة بلا مبدأ ولابد أن تتعلم قبل أن تدمر حياة الآخرين ..كان مدخلي لها من خلال نقاط الضعف عندها فهي تعشق المال ،أغويتها وزينته في عينيها وجعلتها تحلق في السماء كالطائر الحالم برغد الحياة رفعتها مثلما تفعل الأرجوحة حتى يكون السقوط مؤلماً..
مرت الأيام وأنا أهتم بها أكثر من قبل حتى تزداد ثقتها بي..
وفي يوم عرضت عليها عرض خاص:
-أشرقت حبيبتي عاوزه منك خدمة وهايكون ليكي عمولة طبعاً..
-ياسلام اؤمري..
-شوفي ياستي هشام جابلي عربية جديدة في عيد ميلادي هاستلمها بكرة وعربيتي القديمة اتفقت مع صاحب المعرض أنه هايبعهالي ..وأنا فهمت هشام أني هاخد ١٠٠الف جنية من فلوس العربية عشان المدرسة محتاجاهم وبصراحة أنا عاوزاهم لنفسي أنا مفيش حاجه خالص باسمي..
-معقول ؟؟دا أنا بقول إن كل حاجة باسمك..
-لا خالص حتى المدرسة شركا فيها مع إن الأرض بتاعت بابا وأنا كل فلوس شغلي حطيتها فيها ..أنا كنت بشتغل ليل نهار ..أومال هشام بيحبني ليه عشان كده..
-طيب مطلوب مني إيه ..
-هاديكي الفلوس معاكي لحد ماهشام يسافر مع باباه يعمل العملية وأروح البنك أفتح حساب وابقى اخدهم بس هاتمضيلي وصل أمانة وسامر جاي دلوقتي هو الأستاذ رأفت مدرس الحاسب هايكونوا شهود..ممكن ولا إيه ؟؟
-ممكن طبعاً بس لازمتها إيه وصل الأمانة دا ..
إوعي تكوني فاكرة إني مش واثقة فيكي عشان كده هاخليكي تمضي..لا أبداً بس عشان لو هشام عرف هاقوله إنك أخدتيهم سلف تساعدي خطيبك في توضيب الشقة وإنت اللي طلبتي تمضي وكمان صممتي على وجود الشهود..وإني قولت له هاحطهم في المدرسة عشان ماتتحرجيش منه..موافقة ولا اشوف حد تاني ولو أني مش هاثق في حد غيرك ..وعمولتك ياستي هاتكون ١٠ آلاف جنية هدية مني ليكي ..
-موافقة طبعاً يلا هاتي الشهود والوصل ..
-شكراً ياحبيبتي أنقذتيني من ورطة كبيرة..
-أنا المفروض اللي أشكرك أنا بصراحة من يوم ماعرفتك وحياتي بقت أحسن وكفاية إنك عرفتيني على سامر ..
-وعلاء ؟ نسيتيه ؟؟
-مشكلتك إنك فهماني..أنا فعلاً كنت معجبة بعلاء ولما طلبت منك دكتور عيون عشان كنت عاوزه أروح له ..
-يعني إنت كنتي عارفاه؟؟
-أيوا كان بيعالج ماما من المية البيضا اللي على عينها وعمل لها عملية بس للأسف هو ماكنش فاكرني وعشان كده روحت معاكي عشان الفت نظره وحتى لما كلمته مااهتمش ورد عليا بشكل رسمي جدا وأحرجني..
-وأنكرتي لما سألتك إنك كلمتيه صح؟؟
-أيوا خفت أقولك هاتظني فيا السوء..
-وهو اللي إنت عملتيه مش سوء بتجري ورا راجل متجوز وتدبري وتخططي وتقولي هاتظني فيا ..
-اعمل إيه أنا نفسي أتجوز حد كويس عشان نادية هانم تتغاظ..
-نادية مين؟
-مديرة المدرسة اللي رفضت تجوزني ابنها عشان مش قد المقام..
-وعشان هي عملت معاكي كده تأذي الناس، افرضي علاء كان إتعلق بيكي ذنبها إيه مراته وأنا كمان شكلي هايكون إيه قدامهم..
-وأنا ذنبي إيه يحصل لي كل دا عشان أمي عاملة وأبويا موظف بسيط على قده..
-يعني عشان في ناس تفكيرها عقيم تعملي كده؟؟ يمكن خير ليكي إن الست دي رفضتك ..يمكن اللي جاي ليكي أفضل لو كنتي فكرتي بطريقة أحسن من كده..
-إنتِ مش هاتحسي بيا لإنك مش مكاني وحياتك غير حياتي..
-محدش بيختار حياته وكلنا في حاجات نقصانا بنكملها بالرضا..
-اللي ايده في المية مش زي اللي ايده في النار..
-إنتِ غلطانة إنك بتفكري بالطريقة دي وكفاية كلام دلوقتي عشان سامر وصل وأنا هاتصل على رأفت عشان يجي..
بعد كلامي معها وطريقة تفكيرها ونواياها السيئة تمسكت بشدة بهدفي في الإنتقام منها ..
ومرت أول خطوة بسلام وأخذت المال ووقعت على الوصل بشهادة الشهود ..
وفي اليوم التالي بدأت في تنفيذ الجزء الثاني من الخطة:
أشرقت ياللي اسمك على اسمك أصغر مني لكن أذكى مني بكتير. إنت قولتي لي قبل كده لو في مشكلة هاتحليهالي صح؟؟
-طبعاً يامديرتي وصاحبة مدرسة الشروق أجمل مدرسة في البلد كلها..
-شوفي في واحدة عاوزه تقدم لبنتها وأنتِ عارفه إن التقديم خلص وإحنا لنا كثافة معينة مانقدرش نتخطاها وللأسف الست دي كانت مسافرة ومالحقتش تقدم لبنتها في أي مدرسة وأنا بصراحة مش عارفه اتصرف معاها إزاي ..
-ولا يهمك أنا هاتصرف هي فين الست دي ..
-في المكتب عند هند..روحيلها وابعتيلي هند ضروري..
-تمام ياريسة..
-ذهبت لمقابلة السيدة وجاءت هند وتركتها وهي لاتدري أن المكتب مراقب بالصوت والصورة ..إنه سامر المبدع الذي جهز المكتب بكل شئ..
وتم الجزء الثاني من الخطة أيضاً بسلام وكأني أقرأ أفكارها وأعلم مابداخلها وماتريد…
فلقد عرضت عليها السيدة رشوة في مقابل أن تقوم بإخفاء ملف أحد الأطفال وتضع ملف ابنتها مكانه..
وكعادتها تعشق المال وافقت وهي لا تدري أنها تضع نهاية أحلامها بنفسها..
وأنا اتظاهر بالبراءة والطيبة وأتعامل معها على أنها هي مديرة المدرسة وهي التي تملك كل شئ..
وجاء موعد الهبوط أقصد السقوط من أعلى الأُرجوحة. ..
أخبرتها أن هشام عرف الحقيقة وأنا أريد المال ..
توترت وانهارت وقالت:
الفلوس؟؟؟
-أيوا الفلوس ال ١٠٠ جنية..
-أصل أنا…
-إنتِ إيه ؟؟هو الموضوع صعب هاتجيبي الفلوس من البنك وخلاص مش الفلوس في حسابك ولا في البيت ..
-مش إنتِ قولتي إنِك مش هاتحتاجيها دلوقتي..
-أعمل إيه بس هشام شاف الميزانية وحسابات المدرسة وعرف إن الفلوس مش في المدرسة ومحتاجهم عشان عملية باباه، وأنا قولت له إنهم معاكي عشان بتساعدي خطيبك وهاتجيبيهم على طول ..إحنا مش كنا متفقين..إيه اللي موترك كده..
-أصل سامر أخد الفلوس ..
-سامر !! وسامر أخدهم ليه..
-عشان كان محتاجهم..
-محتاجهم في إيه إنطقي..
-سامر قالي إن عنده محل في منطقة حيوية جداً بس متأجر إيجار قديم وعشان يقدر يبيعه لازم يدفع للمستأجر ٢٠٠ ألف جنية لأن المحل هايجيب له مليون جنية وهو مش معاه غير ١٠٠بس لأن فلوسه وديعة في البنك ولو فكها هايخسر كتير ..
-وماقولتليش ليه؟؟
-سامر قالي بلاش أقولك عشان هشام مش هايوافق وإنك متقدريش تعملي كده من ورا هشام..وإن اللي هايشتري المحل جاهز في الفلوس يعني يومين وهايجيبهم..
-وإنت صدقتي؟؟
-طبعاً أنا بصدق سامر في كل حاجة وهابقى شريكته في المركز وفي حياته كمان..
-إنت عارفه سامر فين دلوقتي ؟؟
-مش عارفه بس شكله بيخلص إجراءات البيع لإني بتصل عليه من إمبارح بليل مش بيرد..
-ومش هايرد ..
-يعني إيه..
-يعني سامر خلاص دوره انتهى ومش هايرد ومش هتلاقيه وحضرتك هاتتسجني بالفلوس اللي إنتِ اتصرفتي فيها من دماغك..غباءك وطمعك ضيعك..
-تقصدي إيه ؟؟سامر غدر بيا .
-إنت اللي غدرتي بنفسك ..
-طيب سامر فين مش بيرد عليا ليه ..
-هاقولك سامر فين وهاقولك كمان إيه اللي منتظرك تاني …إنت لسه شفتي حاجه..
-حرام عليكي قوليلي سامر فين وعمل كده ليه ..وتقصدي إيه بكلامك دا وإيه اللي منتظرني.
-السجن طبعاً في قضية رشوة..اللي اتفقت مع الست عليها وهاتتقابلوا بكرة عشان تاخديها كل حاجة متسجلة صوت وصورة والملف اللي سرقتيه عشان تحطي ملف البنت التانية..
إنتِ فاكراني نايمة عشان وثقت فيكي وأمنت لك..
هاقولك سامر فين بس تقوليلي الأول كنتِ عاوزه مني إيه وكنتِ ناويه لي على إيه
-انطقي ..